रावल निकट नेताहरूका अनुसार यही १७ पुसमा पार्टी निर्माणसम्बन्धी जानकारी दिन पत्रकार सम्मेलन आयोजना गरिँदै छ । रावलका अनुसार बुधबार नै पार्टी घोषणा हुने छैन । तर, देश दौडाहमा जानु अगाडि पार्टी निर्माणसम्बन्धी जानकारी दिन पत्रकार सम्मेलन गर्न लागिएको हो ।
रावललाई गत १० पुसमा एमालेले पार्टी सदस्यबाट हटाउने निर्णय गरेको थियो । उक्त निर्णयलगत्तै रावल पार्टी निर्माणको अभियानमा जुटेका हुन् । रावलले हालै एमालेमा निष्क्रिय रहेका र अन्य नेताहरूसँग समेत संवाद गरेका छन् ।
संवादका क्रममा ती नेताहरूले एमाले अध्यक्ष केपी शर्मा ओलीको लोकप्रियता कम हुँदै गएको र एमालेमा असन्तुष्टहरूको समूह रहेको तथा यो समयमा नयाँ पार्टी बनाएर अगाडि बढ्दा सहज हुन सक्ने सुझाएका छन् । यो सुझावसमेतलाई लिएर देश दौडाहमा निस्कन लागेको रावल निकट नेताहरू बताउँछन् ।
व्यापारी मीनबहादुर गुरुङले जग्गासहित एमाले पार्टी कार्यालय बनाइदिन लागेका छन् । यही विषयमा फरक मत राखेकै विषयलाई प्रमुख आधार बनाएर रावललाई एमाले सचिवालयले पार्टीबाटै निष्कासन गरेको हो ।
कतिपयले एमाले अध्यक्ष ओलीसँग निरन्तर असहमति राखेको र पार्टी कार्यालय बनाउन लागेको विषयमा आलोचना गरेकाले एमालेबाट रावल निष्कासनमा परेका टिप्पणी पनि गरेका छन् ।
३ वर्षअघि चितवनमा भएको नेकपा एमालेको १०औं महाधिवेशनमा अध्यक्षमा पराजित भएपछि रावल एमालेको भूमिकामा आउनै सकेका थिएनन् । सल्लाहकार परिषद्को सदस्यको रूपमा रावललाई ओलीले थन्क्याउन खोजेका थिए । अन्ततः पार्टीबाट निकालिए ।
अध्यक्ष ओलीको कार्यशैलीको आलोचना गर्ने शैलीले निरन्तरता पाउँदा रावल एमालेमा रहन नसकेका कतिपयको टिप्पणी छ । रावलले भाटभटेनीका संचालक गुरुङले पार्टीका लागि जग्गासहित भव्य कार्यालय बनाइदिने भनेर गरेको शिलान्यासको सदाझैँ विरोध गरेपछि ओली रुष्ट भएका थिए ।
गत २५ असोजमा कीर्तिपुरमा बन्नेगरी भएको पार्टी कार्यालय भवनको शिलान्यासको विरोध गरेका रावल पार्टीबाट निष्कासित भए भने थप २ जना ६ महिनाका लागि निलम्बनमा परेका छन् । स्थायी कमिटी सदस्य विन्दा पाण्डे र केन्द्रीय सदस्य उषाकिरण तिमिल्सिना ६ महिनाका लागि पार्टीबाट निलम्बन गरिएको छ ।
विगतमा पार्टीमै रहेरसमेत नयाँ पार्टीको अभ्यासमा लागेको कतिपयको आलोचनाका बीच पार्टीबाट निष्कासनमा परेपछि रावलले अन्ततः आफ्नै पार्टी बनाउने भएका हुन् ।
उक्त पार्टीलाई ‘समाजवादी’ तर ‘गैरकम्युनिस्ट’ पार्टी बनाउने भन्दै रावलले कांग्रेस, नेकपा (एकीकृत समाजवादी)लगायतबाट विचलित भएका वा ती पार्टी छाडेर बसेका केही नेताहरूलाई समेत आफ्नो पार्टीमा गोलबद्ध गर्ने प्रयास गरिरहेका छन् ।
