काठमाडौं । सहकारी ठगी प्रकरणमा पक्राउ परेका रास्वपाका सभापति रवि लामिछानेलाई छुटाउन रास्वपाका नेताहरुले बालुवाटार पुगेको खुलासा भएको छ ।
रास्वपाका उपसभापति डीपी अर्याल र प्रमुख सचेतक सन्तोष परियार प्रधानमन्त्री केपीशर्मा ओलीलाई भेट्न बालुवाटार पुगेको एमालेका केन्द्रीय सदस्य विष्णु रिजालले खुलासा गरेको हुन् ।
‘दिनभरि प्रधानमन्त्रीका विरूद्धमा व्यक्तिगत रूपमा गालीगलौज गर्ने, शव बनाएर दाहसंस्कार गर्ने जस्तो अशोभनीय काम गर्ने, नामै लिएर लाञ्छना लगाउने रास्वपाका साथीहरू रातिरराति कुन मुख लिएर बालुवाटारमा कुरेर ‘रविजीलाई बचाइदिनुपर्यो लौ न’भनेर हारगुहार गर्दा हुन् ?’ रिजालले भनेका छन् ।
यसअघि अर्यालले सोमबार गृहमन्त्री रमेश लेखकसँग पनि भेटेर रविलाई बचाइदिन अनुरोध गरेका थिए । पूर्व गृहमन्त्रीसमेत रहेका रवि कार्तिक २ गतेदेखि कास्की प्रहरीको हिरासतमा छन् ।
रास्वपाले भने सरकारले राजनीतिक प्रतिशोध साँधेको भन्दै आन्दोलन गरिरहेको छ । आज रास्वपाले सरकारको कदमविरुद्ध दिउँसो १२ बजेबाट प्रधानमन्त्री निवास बालुवाटार घेराउ गर्ने तयारी गरेको छ । सभापति लामिछानेलाई सहकारी ठगी र सङ्गठित अपराध कसुरमा प्रहरीले कात्तिक २ गते पक्राउ गरेपछि रास्वपाले दैनिक रुपमा विरोध प्रदर्शन गर्दै आएको छ ।
आन्दोलनको नेतृत्वको उपसभापति स्वर्णिम वाग्ले र डिपी अर्यालले गरेका छन् । यसअघि रास्वपाले तिहार भित्रिएसँगै आजबाट देशव्यापी रुपमा आन्दोलनबाट ब्याक हुने जनाएको थियो ।
रास्वपाले पोखराबाट आन्दोलनलाई काठमाडौं केन्द्रीत गरिरहेको छ। सहकारी ठगी र संगठित अपराधको आरोपमा पक्राउ परेका लामिछानेविरूद्ध सम्पत्ती शुद्धीकरणको मुद्दा पनि चलाइने भएको छ।
लामिछानेविरूद्ध रूपन्देही जिल्ला अदालतले पनि पक्राउ पुर्जी जारी गरेको छ। उनलाई बुटवल, पर्सा, वीरगन्ज र चितवनपछि काठमाडौं ल्याउने तयारी भएको छ।
