काठमाडौं । नेकपा माओवादी केन्द्रले सरकारविरुद्धको प्रदर्शनमा ३० हजार मानिस उतार्ने भएको छ । आज शनिबार काठमाडौंकाे भृकुटि मण्डपमा गरिने सभालाई ‘खबरदारी सभा’ नाम दिइएको विरोध प्रदर्शनमा माअओवादीले ३० हजार मानिस उतार्ने भएको हो ।
प्रदर्शनमा सबै जनवर्गीय संगठनहरुलाई विरोध कार्यक्रममा सहभागी हुन माओवादी केन्द्रले निर्देशन दिएको छ । प्रदर्शन भ्रष्टाचार र बेथितिविरुद्ध केन्द्रित हुने माओवादीको भनाइ छ । खबरदारी सभा सुरु हुनुअघि बिहान साढे ११ बजे भद्रकाली, सुन्धारा र काठमाडौं मल अगाडि कार्यकर्ताहरु भेला हुनेछन् ।
त्यसपछि जुलुस सुरु हुने छ । सभामा सहभागीहरुले राष्ट्रिय झण्डा, पार्टीको झण्डा, ब्यानर, नारा लेखिएका प्लेकार्ड बोकेर सरकारविरुद्ध नारा लगाउने छन् ।
सो जुलुस रत्नपार्क, बागबजार, पुतलीसडक, पद्मोदय मोड हुँदै भृकुटीमण्डपको सडकमा पुगेर सभामा परिणत हुने छ । सभालाई नेकपा माओवादी केन्द्रका अध्यक्ष पुष्पकमल दाहाल प्रचण्डले सम्बोधन गर्ने कार्यक्रम रहेको छ ।
भिडियाेकाे लागि याे लिङ्कमा जानुहाेस https://www.facebook.com/share/v/EHoEifihYgrXUT8p/
