१४ पृष्ठ लामो सुझावमा नेतृत्वको असक्षमतामाथि प्रश्न उठाउदै अध्यक्ष प्रचण्डलाई नेतृत्व छाड्न सुझाव दिएका दिएपछी उप महासचिव शर्माको अध्यक्ष प्रचण्ड संग बिद्रोह शुरु भएको चर्चा चलेको हो ।
सशस्त्र संघर्षलाई शान्ति प्रक्रियामा रूपान्तरण गर्दै पहिलो संविधान सभाको निर्वाचनमा होमिँदा पार्टीले प्रत्यक्षतर्फ १२० स्थान जितेको र त्यतिबेला माओवादीले ३१ लाख मत प्राप्त गरेको र त्यसयता १४ लाख, ११ लाख हुँदै खुम्चिँदै शून्यतर्फ अभिमुख भइरहेको शर्माको भनाइ थियो ।
अहिले माओवादीको संरचनाभित्र जे–जति क्रियाशील छन्, ती सबै असन्तुष्टि बोकेर बाँचिरहेको शर्माको मत रहेको छ ।
शान्ति प्रक्रियायता पटकपटक सरकारको नेतृत्व गरे पनि र सरकारमा सहभागी भए पनि उपलब्धिहरू संस्थागत गर्न भने नेतृत्व चुकेको शर्माले आरोप लगाउनुभएको छ । नेतृत्व चुक्नुका पछाडि शर्माले १० बुँदामा त्यसको व्याख्या गर्नुभएको छ ।
नेतृत्व चुकेकै कारणले बलिदान, पार्टी र नेतृत्वले खेलेको ऐतिहासिक भूमिका र जनताको योगदानबाट प्राप्त उपलब्धिहरू आखिर केका लागि भन्ने प्रश्न उठ्न पुगेको शर्माको निष्कर्ष छ ।
‘यसबीचमा माओवादी पार्टी योजनाविहीन र संगठनविहीन बन्न पुग्यो। आज हामीसँग संविधानका अलवा न जनाधार छ, न संगठन छ । केही सीमित उपलब्धिबाहेक न कुनै देखाउनलायक कामहरू छन्, न हाम्रो कुनै मौलिक विकासको मोडल छ । हाम्रा एजेन्डाहरू खोसिँदै जाँदा हामीलाई माया गर्ने वर्ग, जाति, समुदाय, हाम्रा व्यवहार र निर्णयले टाढिएको छ। सहरी जनमानस त हामीप्रति आकर्षित हुन सकेको छैन,’ शर्माको भनाइ छ।
उहाँले पार्टी विकृत बन्दै गएको अन्तरसंघर्षलाई चित्रण गर्नुभएको छ । अन्तरसंघर्ष सञ्चालन गर्ने सन्दर्भमा एकथरीले अन्धसमर्थन गर्ने र अर्कोले वर्गसंघर्षकै रूपमा बुझ्ने प्रवृत्ति हाबी भएको उहाँले उल्लेख गर्नुभएको छ ।
उनले नेतृत्व हस्तान्तरणबिना पार्टी पुनर्निर्माणको प्रश्न हल नहुने आशय व्यक्त गर्दै अध्यक्षलाई नेतृत्व हस्तान्तरण, नेतृत्व पुस्तान्तरण र केन्द्रीय कमिटी भंग गरी महाधिवेशनमार्फत प्रत्यक्ष निर्वाचनबाट नयाँ नेतृत्व चयनमध्ये एक बाटो रोज्न सुझाव दिनुभएको छ ।
शर्माको प्रस्तावले माओवादीभित्र फेरि अर्को तरंग चलेको छ । विशेषगरी उहाँले प्रचण्डप्रति आफ्नो सुझावमा असन्तुष्टि प्रकट गर्नुभएको छ ।
