काठमाडौं । नेकपा एकीकृत समाजवादीको पछिल्लो केन्द्रीय कमिटी बैठकमा सदस्यहरुले उठाएको लगभग साझा प्रश्न थियो–केन्द्रीय कमिटीका लगभग आधा सदस्य कता गए ?
साढे ३ सय सदस्यीय केन्द्रीय कमिटीमध्ये पछिल्लो बैठकमा डेढ सयजति मात्र उपस्थित भएपछि अरु कहाँ गए ? छाडेर जानेहरुको विवरण अध्यावधिक किन गरिएन भन्ने प्रश्न उठेको केन्द्रीय सदस्य गम्भीरलाल श्रेष्ठले पुष्टि गरे ।
गत जेठ पहिलो साता सम्पन्न पार्टीको केन्द्रीय कमिटी बैठकमा आधाजसो सदस्य अनुपस्थित भएको सन्दर्भले नेकपा एसभित्र नेतृत्व तहमै पार्टी बन्दैन भन्ने निराशा छाएको टिप्पणी बैठक परिसरमै भएको थियो ।
कतिपय नेताले त ‘अब यो पार्टी माधव नेपाल प्रधानमन्त्री बन्ने वा नबन्नेसँग यसको अस्तित्व जोडिएको छ’ भन्नसमेत भ्याए । अलग्गै पार्टीको अस्तित्व कायम रहन्छ भन्नेमा नेकपा एसका नेताहरुमा समेत विश्वास छैन ।
नेकपा एसले असार अन्तिम साता महाधिवेशनको मिति तोकिसकेको छ । राष्ट्रिय पार्टी बन्न नसकेको एसको जनमत यो अवधिमा थप कमजोर बनेको इलाम र बझाङको उपचुनावले पनि पुष्टि गरिसकेको छ ।
यो अवस्थामा थप निराशा चिर्न महाधिवेशनले केही नयाँ नीति र कार्यदिशा लिने नेताहरुको दावी छ । नेकपा एसका महासचिव घनश्याम भुसालले असारको महाधिवेशनबाट आफ्नो पार्टीले नेपालको कम्युनिस्ट आन्दोलन र समाजवादी कार्यदिशामा नयाँ अध्याय थाल्ने दावी गरेका छन् ।
यद्यपी नेता कार्यकर्ताको पलायन भने रोकिएको छैन । नेकपा एस स्थापनाको तीन वर्ष नपुग्दै ४४ केन्द्रीय सदस्य र २० जिल्लाका अध्यक्ष एमालेमा फर्किसकेका छन् । अरु केही निष्क्रिय बसेका छन् । केहीले राजीनामा दिएर हिँडेका छन् ।
नेकपा एस निर्माणदेखि पछिल्लो महिनासम्म केन्द्रीय नेता र जिल्ला कमिटीहरु नै एमालेमा समाहित भइरहेका छन् । कतिपय नेता कार्यकर्ता एमालेमा फर्किएर पनि दोस्रो दर्जाको व्यवहार हुने भनेर पार्टीगतरुपमै समाहित हुने समय समेत पर्खेर बसेका छन् ।
हालसम्म वरिष्ठ नेता मुकुन्द न्यौपाने, उपाध्यक्ष केदार न्यौपाने, सचिव भागवत विश्वासीसहित ४४ जना केन्द्रीय सदस्य एमालेमा फर्किएको नेकपा एसको रेकर्डमा देखिन्छ । जिल्ला अध्यक्षहरुको संख्या पनि २० पुगेको छ । त्यसभन्दा तलको रेकर्ड छैन ।
केन्द्रीय सदस्य रिक्त रहेको ठाउँमा केही पूर्ति गरिएको छ भने जिल्ला अध्यक्षले छाडेका ठाउँमा अरुलाई जिम्मा दिइएको छ । महाधिवेशनपछि पार्टीमा नयाँ उर्जा आउने र अहिलेको कतिपयमा देखिएको निराशा अन्त्य हुने दावी पोलिटव्यूरो सदस्य होम बुढाथोकीको छ । एमालेमा फर्किएकाहरुको त्यहाँ झनै विचल्ली र पश्चातापको अवस्था रहेको उनले बताए ।
मकवानपुर जिल्ला अध्यक्ष छाडेर एमालेमा फर्किएका श्रीधर पोखरेल ठिक २ वर्षपछि सोमवार एमालेको जिल्ला अध्यक्ष निर्वाचित भएका छन् । त्यस्तै स्यांजाको अध्यक्षबाट एमालेमा फर्किएका आरसी भट्टराई एमालेको जिल्ला सचिव निर्वाचित भएका छन् ।
केहीले पार्टी विभाजनलगत्तै एमाले फर्किएर सांसद नै जित्न सफल भइसकेका छन् ।
