काठमाडौँ । सत्ता साझेदार ठुला दल, नेकपा एमाले र नेकपा माओवादी केन्द्र, को कार्यशैलीप्रति सन्तुष्ट बन्न नसकेका नेकपा (एकीकृत समाजवादी) का अध्यक्ष माधवकुमार नेपालले कम्तीमा आगामी असारमा हुने पार्टीको दशौँ महाधिवेशनसम्म केन्द्रीय सत्ता गठबन्धनको साथ नछोड्ने भएका छन् । आगामी असारमा हुने महाधिवेशनमा छलफल गरेर गठबन्धनमा रहने वा नरहने भन्ने ठोस निर्णय गर्ने अध्यक्ष नेपालको भनाइ छ ।
केही दिनअघि नेपाली कांग्रेसका सभापति शेरबहादुर देउवा निवासमा भएको विपक्षी मोर्चाको बैठकमा सहभागी भएका अध्यक्ष नेपालले आइतबार आयोजित पत्रकार सम्मेलनमा आफ्नो पार्टी दुई डुङ्गामा खुट्टा राख्ने पक्षमा नरहेको स्पष्ट पारे । मधेस प्रदेश सरकारमा आफ्नो पार्टीको निरन्तरता अघिल्लो गठबन्धन अनुसार नै भएकाले त्यसबारे तत्कालै निर्णय गरेर नयाँ गठबन्धनलाई साथ दिने तयारीमा रहेको सङ्केत आइतबार आयोजित पत्रकार सम्मेलनमा दिए ।
‘हामी दुईवटा डुङ्गामा खुट्टा राखेर हिँड्दैनौँ,’अध्यक्ष नेपालको भनाइ छ । सत्ता साझेदार एमालेका नेताहरूले एकीकृत समाजवादीका अध्यक्ष नेपाल अलमलमा परेको र गन्तव्य स्पष्ट नभएको बताउँदै आएका बेला नेता नेपालको प्रस्टीकरण स्वरूप यस्तो भनाई आएको हो ।
अध्यक्ष नेपालले कांग्रेस सभापति देउवासहितका प्रतिपक्ष दलका नेताहरूसँगको आफ्नो भेटलाई लिएर प्रचण्ड र ओलीलाई नआत्तिन पनि आग्रह गरे । उनले आफ्नो नेतृत्वको पार्टी राजनीतिको महत्त्वपूर्ण घटक भएको भन्दै सबै नेताहरूसँग छलफल गर्नु स्वाभाविक रहेको सुनाए ।
‘सबैले नेताहरूसँग भेट गर्न र सम्पर्क बढाउन पाउँछन्,’ उनले भने । अध्यक्ष नेपालले सरकार र सत्तापक्षमा कुनै असमझदारी नहोस् भनेर विपक्षी मोर्चाको बैठकमा सहभागी हुनुअघि प्रधानमन्त्री पुष्पकमल दाहाल प्रचण्डलाई जानकारी गराएको नेपालको भनाइ छ ।
‘हामी एउटा महत्त्वपूर्ण राजनीति घटक भएको हुनाले हामी त्यो (बूढानीलकण्ठ) बैठकमा सहभागी भयौँ । सबैले सबै नेताहरूसँग सम्पर्क गर्न पाउँछन्, हामी पनि पाउँछौँ । अन्यथा रूपमा कसैले आत्तिनुपर्ने आवश्यकता छैन,’ पत्रकार सम्मेलनमा पूर्व प्रधानमन्त्री समेत रहेका नेता नेपालले भने, ‘त्यही सिलसिलामा मैले असमझदारी नहोस् भनेर प्रधानमन्त्रीलाई फोन पनि गरेँ । उहाँले भन्नुभयो – ठिक छ, सम्बन्ध सबैसँग राख्नुपर्छ तर ‘कमिटमेन्ट’ फाइनल नगरिदिनु होला ।’
नेपालको राजनीति कति बेला के हुने हो भन्ने स्थितिमा छलफल र संवादबाट विश्वास जित्न सकिने नेपालको विश्वास छ । उनले सत्ता सहकार्यका सवालमा प्रधानमन्त्री प्रचण्ड र एमाले अध्यक्षसँग छलफल जारी रहेको र भएका छलफलहरू सकारात्मक ढङ्गले अघि बढिरहेको पनि बताए ।
‘छलफल र संवाद जारी छ । छलफलपछि एउटा समझदारीमा पुगिन्छ । समझदारी भइसकेपछि त्यसै आधारमा अघि बढिन्छ,’ अध्यक्ष नेपालको भनाइ छ ।
अध्यक्ष नेपालले राजनीतिक अन्योल कायम रहेको भन्दै त्यो अन्योललाई टुङ्ग्याउनुपर्ने अवस्थामा राजनीतिक छलफल र संवादले महत्त्वपूर्ण काम गर्ने बताए । ‘सरकारमा बस्ने कि नबस्ने भन्ने प्रश्नहरू उठेका छन् । तर निर्णयमा पुगिसकेका छैनौँ । अन्तिम निर्णय गर्न बाँकी नै छ । छलफलकै क्रममा रहेकाले पार्टीको बैठकले अन्तिम टुङ्गो लगाउँछ,’ नेपालको भनाइ छ ।
‘हामी राष्ट्रिय महाधिवेशनको सङ्घारमा छौँ । त्यसैले समीकरण बदल्ने वा नबदल्नेबारे महाधिवेशनमै छलफल गर्छौँ र त्यसका आधारमा अघि बढ्छौँ,’ ती नेताले भने, ‘कम्तीमा महाधिवेशनसम्म हामी यो समीकरणमै रहन्छौ ।’
नेकपा एकीकृत समाजवादीका एक पदाधिकारीका अनुसार पार्टीभित्र वर्तमान सत्ता समीकरणमा रहने वा नरहने भन्ने दुई धार छ । ‘यही सत्ता समीकरणलाई निरन्तरता दिनपर्ने बहुमत छ भने छाडेर बाहिर निस्कनुपर्छ भन्ने अल्पमतमा छ,’ उनी भन्छन् । ती नेताका अनुसार सरकारबाट तत्काल हटेर विपक्षी मोर्चामा जानुपर्ने पक्षमा नेता राजेन्द्र पाण्डे, मेटमणि चौधरी र स्वयं माधव नेपाल रहेका छन् ।
झलनाथ खनालसहित प्रतिनिधि सभाका बहुमत सांसदहरू प्रचण्ड नेतृत्वको सरकारलाई निरन्तरता दिनुपर्ने पक्षमा छन् । यस्तो अवस्थामा माधव नेपाल विपक्षी मोर्चामा तत्काल सहभागी हुन सक्ने अवस्थामा छैनन् ।
फागुन २१ मा बनेको एमाले माओवादीसहितको समीकरणको साथमा सुदूरपश्चिममा मुख्यमन्त्री र बागमतीमा २ मन्त्री पाएको एकीकृत समाजवादी मधेस सरकारमा भने पुरानै समीकरण अनुसार सहभागी छ । एकीकृत समाजवादीलाई मधेस सरकारबाट फिर्ता हुन र नयाँ सरकार बनाउन सहयोग गर्न एमाले र माओवादीले सुझाव दिए पनि समाजवादीले निर्णय गरिसकेको छैन ।
