काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो पार्टीमा हर्क साम्पाङ र बालेन शाहलाई जोड्न सके खुसी हुने बताएका छन् ।
बिहीबार पार्टी केन्द्रीय कार्यालयमा आयोजित चियापान कार्यक्रममा सञ्चारकर्मीहरुसँग कुराकानी गर्दै सभापति लामिछानेले आफ्नो सम्बन्ध दुवै जनासँग सौहार्दपूर्ण रहेको उल्लेख गर्दै दुवैको कामको प्रशंसा आफूले गरिरहेको बताए । दुई जनालाई पार्टी प्रवेश गराउन सके खुशीको कुरा हुने उनको भनाई थियो ।
‘यो त राम्रो हुन्थ्यो त्यस्तो साथीहरुलाई हामीले जोड्न सके त असाध्यै राम्रो हुन्थ्यो। त्यो त हाम्रो चाहाना छँदैछ । चाहना अनुरुप अन्य साथीहरुले पनि त्यसैगरी सोचिदिनु भयो भने हाम्रो तर्फबाट त सय प्रतिशत सकारात्मक छौँ। हाम्रो सौहार्दपूर्ण सम्बन्ध छ’, उनले भने, ‘उहाँहरुको कामको प्रशंसा गरेकै छु । चुनाव लड्दादेखि निरन्तर उहाँहरुको राम्रो काममा सघाउन निरन्तरता दिएकै जस्तो लाग्छ । त्यो आफैँमा राम्रो संकेत बन्नसक्यो र हुन सकेछ भने हाम्रो लागि त्यो खुशीको कुरा हुनेछ ।’
देशमा नेतृत्वको अभाव रहेको कुरा महसुस गरेको भन्दै नेतृत्व विकासको सिप प्रयोग गर्न पार्टीमा आएको उनको भनाई थियो । समाज परिवर्तनका लागि तयार भएको कुरा मतपत्रमा जाहेर हुन थालेको बताए । त्यसको स्पष्ट संकेत देखिइसकेको उनले बता ए । उनले आफ्नो पार्टीको एक वर्षको यात्रा सौहार्दपूर्ण र सकारात्मक रुपमा बितेको बताए। रास्वपालाई जनताले आशा र भरोसाको रुपमा लिएको बताए ।
‘अत्यन्त सकारात्मक र ऊर्जावान नेपाली जनताले आशा र भरोसाका रुपमा हेरेको यात्राका रुपमा मैले पाएको छु । सुरुवात गर्दा हामीलाई विश्वास त थियो तर त्यो विश्वास मतमा बदलिन्छ कि बदलिँदैन भन्ने कुराको त्यतिधेरै हेक्का थिएन’, उनले भने, ‘समाजले परिवर्तन खोजेको छ भन्ने कुरा हामीलाई थियो । तर साँच्चिकै समाज अब परिवर्तनका लागि तयार नै भएको भएको कुरा मतपत्रबाट नै जाहेर गर्छ भन्ने संकेतका रुपमा घन्टी बजिसके सकेको छ । यो एक वर्षको यात्रा अत्यन्त सौहार्दपूर्ण रह्यो। यसलाई अत्यन्त सकारात्मक रुपमा हेरेको जानकारी गराउँछु ।’
