खोटाङ । खोटाङमा पहिचान पक्षधरले एक प्रदेश सांसदलाई कालो झण्डा देखाएर कार्यक्रमस्थलमै नाराबाजी गरेका छन् । नेकपा एमालेका नेता तथा प्रदेश सांसद पाँचकर्ण राई ‘पिके’लाई कोशी प्रदेश नामाकरणमा मतदान गरेको भन्दै पहिचानसहितको संघीयता पक्षधर आन्दोलनकारीहरुले शनिबार दिक्तेलमा कालो झण्डा देखाएर नाराबाजी गरेका हुन् ।
जिल्ला समन्वय समितिद्वारा आयोजित जिल्ला सभा सञ्चालन भइरहेकै बेला पहिचान पक्षधरका आन्दोलनकारीहरुले कोशी प्रदेश मुर्दावाद, पहिचान विरोधी होसियार, प्रदेश १ को पुनः नामङ्कन गर जस्ता नारा लगाउँदै कालो झण्डा देखाएका थिए । त्यस क्रमममा उनीहरुले सांसद राईलाई कालो मोसो दल्ने समेत प्रयास गरेका थिए । उनीहरुले परैबाट छर्किएको कालो पदार्थको केही छिटा प्रदेश सांसद राई, पूर्वसासंद कुलप्रसाद फुयाँल र बबी चाम्लिङको शरीरमा समेत लागेको थियो ।
जिल्ला सभामा साकेला गाउँपालिका अध्यक्ष रबिपकाश राईले बोले लगत्तै किरात राई यायोक्खा खोटाङका अध्यक्ष युगसन किरातीले कार्यक्रम सञ्चालकसँग आफ्नो धारणा राख्न फोरम मागेका थिए । त्यस क्रममा उनले जिल्लाको कुनै पनि कार्यक्रममा पहिचानविरोधी सांसदहरुलाई नबोलाउन अपिल गरिसकेको र ल्याएमा विरोध हुने बताए । उनीहरु सांसद राईविरुद्ध नाराबाजी गर्दै प्रदर्शनमा उत्रिएपछि कार्यक्रम विथोलिएको थियो ।
सांसद राईविरुद्ध प्रदर्शनमा उत्रिएका चारजनालाई प्रहरीले पक्राउ समेत गरेको छ । पक्राउ पर्नेहरुमा यायोक्खाका अध्यक्ष किराती, सह-कोषाध्यक्ष डार्विन चाम्लिङ, यायोक्खा दिक्तेल रुपाकोट मझवागढी नगर कमिटी पूर्व उपाध्यक्ष सप्तमणि राई र जनता समाजवादी पार्टी (जसपा)का जिल्ला सचिव सुनिल राई रहेका छन् ।
पक्राउ परेकाहरुसँगै नागरिक समाजका अगुवासहितको टोली समेत जिल्ला प्रहरी कार्यालयमा पुगेका थिए । जिला प्रहरी कार्यालय खोटाङले पक्राउ परेकाहरुलाई सामान्य सोधपुछ छाडिएको जनाएको छ ।
प्रदेश-१ को नाम कोशिविरुद्ध यतिबेला पहिचान पक्षधरहरुको आन्दोलन जारी छ । उनीहरुले विभिन्न स्थानीय तहमा तालाबन्दी र कोशी लेखिएको सरकारी कागजातहरु च्यात्नेदेखि साईनबोर्ड हटाउने जस्ता विरोधका अभियानहरु चलाईरहेका छन् ।
पहिचानवादीहरुले पहिचानको विपक्षमा अर्थात प्रदेशको नाम कोशीमा मत जाहेर गर्ने सांसदहरुलाई बहिष्कारदेखि वंश गद्धारको घोषणा समेत गरिरहेका छन् ।
