काठमाडौं । नागरिक उन्मुक्ति पार्टी सत्ता गठबन्धनबाट अलग हुने भएको छ । वर्तमान प्रधानमन्त्री पुष्पकमल दाहाल नेतृत्वको सत्ता गठबन्धनसँग सहकार्य गरेको दुई साता नबित्दै उक्त दल गठबन्धनबाट अलग हुन लागेको हो । उक्त दलका प्रमुख संरक्षक रेशम चौधरीकै निर्देशनमा गठबन्धनबाट अलग हुने निर्णय भएको उच्च स्रोतको दाबी छ ।
नागरिक उन्मुक्ति पार्टीले प्रधानमन्त्री दाहाललाई विश्वासको मत दिएको छ । तर, उक्त दलले प्रधानमन्त्री दाहाललाई दिएको विश्वासको मत फिर्ता लिने र नयाँ गठबन्धन बनाउन निर्णायक भूमिका खेल्ने निर्णय गरेको छ ।
सत्ता गठबन्धनसँगको सम्बन्धविच्छेद भने भोलिबाट नै सुरु हुने स्रोतको दाबी छ । लुम्बिनी प्रदेशका मुख्यमन्त्री लिला गिरीलाई भोलि विश्वासको मत नदिने उक्त दलको निर्णय छ । मुख्यमन्त्री गिरीले भोलि माघ ५ गते विश्वासको मत लिँदैछन । पुस २८ गते मुख्यमन्त्रीमा नियुक्त भएका गिरीलाई नागरिक उन्मुक्ति पार्टीको पनि समर्थन छ ।
गिरीलाई प्रदेशसभाका १० मध्ये ७ दलका ५६ जना र २ स्वतन्त्र गरी ५८ सांसदले समर्थन गरेका थिए । गिरीलाई नेकपा एमालेका २९, माओवादी केन्द्रका १०, राष्ट्रिय प्रजातन्त्र पार्टीका ४, नागरिक उन्मुक्ति पार्टीका ४, जसपाका ३, जनमत पार्टीका ३, लोकतान्त्रिक समाजवादी पार्टीका ३ र स्वतन्त्र २ सांसदको समर्थन रहेको छ । अब नागरिक उन्मुक्ति पार्टीले विश्वासको मत नदिने भएको हो ।
