काठमाडौं । प्रधानमन्त्री पुष्पकमल दाहालले आज/भोलिभित्रै मन्त्रिपरिषद्लाई पूर्णता दिने तयारी गरेका छन् । त्यसको लागि उनले आज सत्ता गठबन्धनको प्रमुख घटक नेकपा (एमाले) का अध्यक्ष केपी शर्मा ओलीसँग भेटवार्ता गरेका छन् ।
आजै साँझ सत्ता गठबन्धनमा आवद्ध दलका शीर्ष नेताहरुसँग पनि प्रधानमन्त्री दाहालले छलफल गर्दैछन् । २६ पुषमा संसद्मा विश्वासको मत लिएका प्रधानमन्त्री दाहालले एक साता बित्न लाग्दा पनि मन्त्रिपरिषद्लाई पूर्णता दिन सकेका छैनन् । यसबारेमा एमाले अध्यक्ष ओलीसमेत चासो राखेपछि आज भने दाहालले तदारुकता देखाएका छन् ।
आज साँझ बस्ने ७ दलको बैठकले मन्त्रिमण्डलको भागबण्डा टुँगो लगाउने भएको छ। मन्त्रालय भागबण्डामा कुरा मिलेपनि सभामुख, राष्ट्रपति, उपराष्ट्रपतिको निर्वाचनबारे भने प्रधानमन्त्री दाहालले रहस्यमयी मौनता साँधेका छन् । यसले पनि सत्ता गठबन्धनमा रहेका दलहरुबीच अविश्वास पैदा भएको छ । भोलि सभामुखको निर्वाचनको कार्यतालिका सार्वजनिक हुँदैछ । यही माघ ५ गते सभामुखको निर्वाचन हुँदैछ ।
