काठमाडौं । नागरिक उन्मुक्ति पार्टीका अध्यक्ष रञ्जिता श्रेष्ठले आफ्नै देशमा आफ्नै सँग पहिचानको अस्तित्व खोज्दा जेल जानुपर्ने भन्दै सरकारलाई प्रश्न गरेकी छन् । प्रतिनिधि सभाको पहिलो बैठकमा सोमबार नागरिक उन्मुक्ति पार्टीको तर्फबाट सम्बोधन गर्दै उनले यस्तो प्रश्न गरेकी हुन् ।
‘रेशम चौधरीलाई कांग्रेस, एमाले, माओवादी जस्ता ठुला राजनीतिक दलको कार्यकर्ता नभएकै कारण झुटा मुद्धा लगाईयो । र, मलाई लाग्छ थारु भएकै कारण रेशक चौधरी लगायतका आज कारागारमा हुनु भएका सम्पूर्ण राजबन्दीहरुलाई मुद्धा लगाईएर यो राज्यले पाँच बर्षदेखि थुनेर राखेको छ’ सम्बोनका क्रममा उनले भनिन्- ‘रेशम चौधरीले अनि निर्देष थारुहरुले के मागेको थियो र ? हामी यो देशका भुमिपुत्र हौँ । हामीलाई पनि थारु हुनुको परिचय देउ भनेका होनन् र ?, आफ्नै देशमा आफ्नैसँग पहिचानको अस्तित्व खोज्दा जेल जानुपर्छ ।’
उनले आफ्नो पति तथा थारु नेता रेशम लगायत अन्य जेलमा रहेकाहरुका लागि न्याय माग गरेकी छन् । ‘आखिर निर्दोष नागरिकलाई किन जेलमै राखिरहने ? निर्दोष थारुहरुलाई किन जेलमै राखिरहने ? आज यही संसद्बाट नै न्याय माग्छु । र, न्याय दिने आशा पनि रहेको छ’, उनले भनिन् ।
उनले जिम्मेवार नेताहरुले रेशम चौधरीलाई निर्दोष भन्ने गरेको स्मरण पनि गरिन् । शेरबहादुर देउवाले रोस्ट्रमबाट, केपी ओलीले कैलालीबाट, पुष्पकमल दाहाल प्रचण्डले टुँडिखेल लगायतका स्थानबाट, गगन थापाले धनगढीको विशाल सभाबाट र रवि लामिछानेले पनि निर्दोष भनेको उनले बताईन् ।
लाल आयोगको प्रतिवेदन सार्वजनिक गर्न माग
नागरिक उन्मुक्ति पार्टीकी अध्यक्ष श्रेष्ठले प्रतिनिधिसभासमक्ष पूर्वन्यायाधीश गिरिशचन्द्र लालको संयोजकत्वमा गठन भएको आयोगको प्रतिवेदन सार्वजनिक गर्न सर्वोच्च अदालतले दिएको आदेशको प्रतिलिपी बुझाएकी छन् ।
उनले सभाध्यक्ष पशुपति शमशेर राणासमक्ष लालको संयोजकत्वमा गठन भएको आयोग सार्वजनिक गर्न सर्वोच्च अदालतले दिएको आदेशको प्रतिलिपी बुझाएकी हुन् ।
२०७२ सालमा संविधान जारी गर्नुअघि तराई-मधेस र थरुहट क्षेत्रमा भएका आन्दोलनका क्रममा भएको जनधनको क्षति छानविन गर्न २०७३ साउन २१ मा पुष्पकमल प्रचण्ड नेतृत्व मन्त्रिपरिषद् बैठकले पूर्वन्यायाधीश लालको संयोजकत्वमा आयोग गठन गरेको थियो ।
आयोगले २०७४ मंसिर २९ गते तत्कालीन प्रधानमन्त्री शेरबहादुर देउवासमक्ष ७ सय ९ पृष्ठ लामो प्रतिवेदन बुझाएको थियो । प्रतिवेदन थप अध्ययनका लागि भन्दै २०७४ पुस १३ गते प्रधानमन्त्री कार्यालयले गृह मन्त्रालयमा पठाएको थियो ।
तराई–मधेस र थरुहटको आन्दोलनकै मुद्दामा अध्यक्ष श्रेष्ठका श्रीमान रेशम चौधरी डिल्लीबजार कारागारमा छन् । उनी नागरिक उन्मुक्ति पार्टीका संरक्षक हुन् । टीकापुरमा ‘थरुहट आन्दोलन’ का क्रममा २०७२ भदौ ७ मा १ बालक र ८ प्रहरीको मृत्यु भएको थियो । उक्त घटनाका मुख्य योजनाकार भनिएका रेशमलाई जिल्ला अदालत कैलालीले २०७५ फागुन २२ गते जन्मकैदको फैसला सुनाएको थियो ।
जिल्ला अदालतको फैसला त्रुटिपूर्ण रहेको र आफू निर्दोष रहेको दाबी गर्दै उनले २०७६ वैशाख २९ मा उच्च अदालत दिपायलमा पुनरावेदन निवेदन पेश गरेका थिए । तर, उच्च अदालत दिपायलले २०७७ पुस २ गते जिल्ला अदालतको फैसला सदर गर्दै जन्मकैदको फैसला सुनाएको थियो ।
रेशमलाई थुनामा रहेकै समयमा २०७५ पुस १९ गते सांसदको शपथ ग्रहण गराइएको थियो । उनी तत्कालीन राष्ट्रिय जनता पार्टी (राजपा)का तर्फबाट कैलाली निर्वाचन क्षेत्र नम्बर १ मा प्रतिनिधिसभा सदस्यमा विजयी भएका थिए । हाल उनले आफ्नो संरक्षकत्वमा नयाँ दल खोलेका हुन् ।
प्रतिनिधिसभामा ३ र सुदूरपश्चिम प्रदेशसभामा ७ सिट जितेको नागरिक उन्मुक्ति पार्टीले रेशम चौधरी लगायत जेलमा रहेका अन्यको रिहाइ नभएसम्म सरकारमा नजाने बताईरहेको छ ।
