काठमाडौं । काठमाडौं उपत्यकाको बढ्दो फोहोर पानी व्यवस्थापनका लागि सरकारले सुरु गरेको प्रशोधन केन्द्र (उपचार पोखरी) निर्माणमा चरम ढिलासुस्ती भएको छ ।
सरकार, एसियाली विकास बैंक र ओपेक कोषको आर्थिक सहयोगमा सन् २०१७ देखि केन्द्रको निर्माण थालिएको थियो । तर, निर्माण कम्पनीको लापरबाहीले ५ वर्षमा एक तिहाइ पनि काम सकिएको छैन ।
आयोजनाअन्तर्गत पहिलो चरणमा काठमाडौंको धोबीघाटमा प्रतिदिन ३ करोड ७० लाख लिटर क्षमताका २ वटा केन्द्र तथा ललितपुरको बालकुमारीस्थित कोड्कुमा १ करोड ७५ लाख लिटर र भक्तपुरको सल्लाघारीमा १ करोड २२ लाख लिटर क्षमताको फोहोर पानी प्रशोधन गर्ने गरी निर्माण सुरु गरिएको थियो ।
सन् २०१७ मे ७ मा करिब ४ अर्ब रुपैयाँको लागतमा ‘साफ्बम’ नामक चिनियाँ कम्पनीले धोबीघाटको एकसहित तीनवटा केन्द्र निर्माण गर्ने सम्झौता गरेको थियो । साढे २ वर्षमा सक्ने गरी सम्झौता भए पनि हालसम्म समग्रमा २७ प्रतिशत काम मात्रै सकिएको छ ।
धोबीघाटमै बनिरहेको अर्को प्रशोधन केन्द्रको काम भने सम्पन्न हुने अवस्थामा रहेको छ । अर्को चिनियाँ कम्पनी ‘सीओसी’ ले निर्माण थालेको उक्त केन्द्रको काम आगामी डिसेम्बरभित्र सक्ने लक्ष्य रहेको मेलम्ची खानेपानी उपआयोजना–२ आयोजना कार्यान्वयन निर्देशनालय (पीआईडी) का आयोजना उपनिर्देशक चन्द्रकुमार श्रेष्ठले बताए ।
उनका अनुसार कोड्कु र सल्लाघारीको केन्द्र निर्माणको काम कोरोना महामारी सुरु भएयता ठप्प छ । लामो समयसम्म काम रोकिँदा केन्द्रका निर्माणाधीन संरचना झाडीले छोपेको छ भने फर्मा गाडेको स्थान पानीले भरिएको छ । ३० प्रतिशत कम मूल्यमा ठेक्का लिएको साफ्बम कोरोना महामारीका कारण आर्थिक संकटमा परेपछि निर्माण अघि बढ्न नसकेको निर्देशनालयले जनाएको छ ।
