काठमाडौं । धनुषाकी निहारिका राजपुतले काठमाडौंको माइतीघरमा दुईदिनदेखि आमरण अनशन जारी राखेकी छन् । यसअघि हिजो २१ महिनाको बच्चासहित न्याय माग्दै आमरण अनशन बसेकी उनलाई प्रहरीले माइतीघरबाट हटाएको थियो ।
तर, आज दोस्रो दिन पनि उनले अनशन जारी राखेकी छन् । आफूलाई एक पुरुषले बलात्कार गरेपछि बच्चा जन्मिएको भन्दै निहारिका कानुनी लडाईंमा छन् । उनले न्याय नपाउँदासम्म अनशन नतोड्ने चेतावनी दिएकी छन् ।
जिल्ला अदालत धनुषाले आरोपीलाई सफाइ दिएपछि उनले उच्च अदालत धनुषामा पुनरावेदन गरेकी थिइन् । तर, चार महिना बितिसक्दा पनि अदालतले पेसी नतोकेपछि आमरण अनशन सुरु गरेकी हुन् । निहारिकाले आफ्नो बच्चाको डीएनए परीक्षण गर्न पाउनुपर्ने लगायत उनको माग रहेको छ ।
उनका मागहरू यस्ता छन्
— मेरो बच्चाको डीएनए टेस्ट गरिनुपर्यो । काखमा बच्चा बोकेर जिल्ला अदालतको अन्तिम फैसला कुरिरहँदा न्यायाधीशहरूले मेरो काखको बच्चा किन देखेनन् रु कुमारी आमाको काखको बच्चालाई लात हानेर अपराधीको पक्षमा फैसला गर्ने दुस्साहस न्यायाधीशलाई कसले दियो रु यसको निष्पक्ष छानबिन हुनुपर्यो ।
— उच्च अदालतमा चार महिनाअघि नै मुद्दा दर्ता गरे पनि अहिलेसम्म पेसी तोकिएको छैन । म र मेरो बच्चा मर्ने अवस्था आइसक्यो । न्यायलयले मेरो मृत्यु चाहेको हो रु उच्च अदालतले छिटोभन्दा छिटो पेसी तोकेर फैसला गरिदिनुपर्यो ।
— मेरो बलात्कारी खुलेआम हिँडिरहेको छ । प्रहरी प्रशासनले उसलाई पक्राउ गरेर पुनः अनुसन्धान गरिनुपर्यो ।
