काठमाडौँ । काठमाडौं महानगरपालिकाको फोहोर व्यवस्थापनका लागि विभिन्न ५ आयोजनाको बजेट काट्न सांसद गगन थापाले प्रस्ताव गरेका छन् ।
मंगलबार आगामी आर्थिक वर्षका लागि विनियोजन विधेयकमाथि छलफलका क्रममा उनले काठमाडौं महानगरमा यो वर्षका लागि छुट्याइएको फ्लाई ओभरको बजेट फोहोर व्यवस्थापनमा खर्च गर्न आग्रह गरे ।
उनले भने–‘फोहोरको व्यवस्थापन गर्न सहरी विकास मन्त्रालयको बजेटले पुग्दैन । अरबौं रुपैयाँ लाग्छ । फोहोर व्यवस्थापनका लागि छुट्टै बजेट छुट्टाइएको छैन, काठमाडौंमा यो वर्ष फ्लाई ओभर, अन्डरपास नभएपनि हुन्छ । बरु काठमाडौं बाहिरको ५ वटा योजना काटे पनि हुन्छ । त्यसबाट केही अरब निकाल्ने हो भने फोहोरको दीर्घकालीन समाधान निस्कन्छ ।’
उनले यसबारे विचार गर्न मन्त्री र सरकारको ध्यानाकर्षण गराए । सांसद थापाले आफ्नो निर्वाचन क्षेत्रमा सडक बिस्तारका लागि विनियोजन भएको ४ अर्ब रुपैयाँ बजेटको काम अझै कार्यान्वयन भइनसकेको बताए ।
ठेक्कामा गएका सडक अस्थव्यस्थ भएपछि मन्त्रालय, सडक विभागमा निवेदनमाथि निवेदन दिएको, निर्माण व्यवसायीको घरमा ८ घण्टा कुरेर भेट्दा पनि काम नभएको उनले बताए ।
