पूर्णप्रसाद न्याैपाने-ओखलढुंगा
कोरोना संक्रमितको स्वास्थ्य परीक्षण गर्न ओखलढुंगामा पिसिआर मेसिन राख्ने सरकारी तयारी छ । कोरोनाको लक्षण देखिएका वा शंका लागेकाहरुको स्वाब परीक्षणका लागि जिल्ला अस्पताल रुम्जाटारमा मेसिन राखिने भएको हो ।ओखलढुंगामा पिसिआर मेसिन खरिदका लागि सरकारले २५ लाख बजेट विनियोजन गरेको प्रदेश १ का भौतिक पूर्वाधार विकास मन्त्री अम्बिरबाबु गुरुङले जानकारी दिए ।जिल्लामै पिसिआर मेसिन राखेपछि स्वाब परीक्षणका लागि प्रदेश र संघको राजधानी सम्म लैजानुपर्ने बाध्यता हट्ने मन्त्री गुरुङको भनाई छ । ‘सरकारले जिल्ला अस्पतालमै पिसिआर मेसिन राख्न बजेट विनियोजन गरेको छ ।
तत्काल मेसिन राखेर सेवा सुरु गर्ने प्रकृयाको थालनी गर्न मैले निर्देशन दिईसकेको छु ।’ मन्त्री गुरुङले भने, ‘यो क्षेत्रमा स्वाब संकलन गरेर टेकु र विराटनगर पठाउँदा साहै्र समस्या भएको पाइयो । अब त्यो समस्या बाध्यता हट्यो । मेसिन खरिद गर्ने र कर्मचारी व्यवस्थापन गर्ने प्रकृयामा हामी लागिसकेका छौं ।’ मन्त्री गुरुङले माथिल्लो सगरमाथा क्षेत्रका ओखलढुंगा, सोलुखुम्बु, खोटाङ र उदयपुरका उत्तरी बेल्डका नागरिकलाई लक्षित गर्दै रुम्जाटार अस्पतालमा पिसिआर मेसिन राख्न पहल गरिएको बताए । काेभिडले समस्यामा परेका जिल्लाबासीले सम्पर्क गरेपछि उनीहरुको उद्धार र उपचारमा सहयोग गर्ने गरेको मन्त्री गुरुङले बताउनुभयो ।कोरोना संक्रमण समुदायस्तरमा समेत फैलिएपछि जिल्लामै पिसिआर मेसिन राखेर परीक्षणको दायरा बढाउनुपर्ने जिल्लाबासीको माग थियो ।
जिल्लामै पिसिआर मेसिन राख्न सरकारले बजेट व्यवस्था गरेपछि अब यस क्षेत्रका नागरिकको कोरोना परीक्षणमा सहजता आउने जिल्ला स्वास्थ्य प्रमुख सुमन तिवारीले बताए । उनका अनुसार स्वास्थ्य कार्यालयमा पर्याप्त जनशक्ति र सवारी साधन नहुँदा कोरोना परीक्षणको दायरा बढाउन समस्या थियो । अझ पर्याप्त एन्टिजेन किट र स्वाब संकलनका लागि आवश्यक औजार अभाव झेल्नुपर्ने समस्या थियो । संकलित स्वाबलाई परीक्षणका लागि विराटनगर र राजधानी काठमाडौं सम्म पुर्याएर निरञ्तर समन्वय गर्न थप झमेला थियो ।
अब रुम्जाटार अस्पतालमा पिसिआर मेसिन जडान भएपछि सोलुखुम्बु, खोटाङ र उदयपुरको उत्तरी क्षेत्रका नागरिकको कोरोना परीक्षणमा समेत सहजता आउने छ ।यसअघि प्रदेश सरकारले जिल्ला प्रशासन र जिल्ला अस्पताललाई कोभिड व्यवस्थापन र हर्कपुरमा होल्डीङ सेन्टर राख्न ३० लाख बजेट पठाईसकेको छ ।
