काठमाडौ । कोरोनाको संक्रमणको दोस्रो लहर नेपालबाट नेपाल अहिले आक्रान्त बनिरहेको छ । संक्रमित बिरामीले अस्पतालमा बेड र अक्सिजन नपाएर मृत्यु भएका खबरहरु दिनहुँ आइरहेका छन् ।
नेपालमा कोरोना महामारी विरुद्ध लड्नका लागि नेपाली युवा क्रिकेटर सन्दीप लामिछानेले अभियान सुरु गरेका छन् । उनले सामजिक सञ्जाल मार्फत आफूले अभियान सुरु गरेको जनकारी दिनुका साथै सम्पुर्णलाई अभियानमा जोडिने समेत आह्वान गरेका छन् ।
सन्दीपले अभियान सुरु गरेको जानकारी सोमबार राती आफ्नो ट्विटरमार्फ दिएका हुन् । ‘यस विषम परिस्थितिमा हामी नेपालीहरु सबै एक जुट भई सद्भाव र सहकार्यले यस कठिन समयको समाना गर्नुपर्ने बेला आएको छ ’ उनले लेखेका छन्, ‘हाम्रो एकता , सकारात्मक सोच, दृढ आत्मविश्वास र आपसी सद्भाव र सहकार्यले यो लडाईँ पक्कै पनि जित्ने छौं ।’
यो लडाइँका लागि अभियान सुरु भएको भन्दै उनले आ–आफ्नो स्थानबाट सहयोग गर्न आग्रह गरेका छन् । ‘म सम्पूर्णलाई विश्वास दिलाउन चाहान्छु । यो अभियानबाट उठेको रकम कोरोना नियन्त्रण, रोकथाम तथा संक्रमितको उपचारका निम्ति नै खर्च हुनेछ ।’
अभियानमा उठेको रकमका बारेमा टिम सन्दीपले सम्पूर्ण जनाकारी गराउने र यो रकम स्थानीय तह/प्रशासन कार्यालयको रोहवरमा अति प्रभावित क्षेत्रमा आवश्यकता तथा प्राथमिकताका आधारमा वितरण गरिने जानकारी दिएका छन् ।
यो अभियानका लागि सेन्चुरी कर्मसियल बैंकको कोटेश्वर शाखामा खाता खोलिएको उनले बताएका छन् । उनले सहयोगका लागि उनले सेन्चुरी बैंकमा रहेको आफ्नो खाता नम्बर ०१७००००३५३ सार्वजनिक गरेका छन् । उनले यसमा आफ्नो तर्फबाट ३ लाख रुपैयाँ राखेर अभियानको सुरुवात गरेका छन् ।
