रामकुमार श्रेष्ठ, नवलपुर ।
२०७२ साल वैशाख १२ गतेको महाविनाशकारी भूकम्पले क्षति भएका संरचनाहरु निर्माणका लागि गठन गरिएको राष्ट्रिय पुनर्निर्माण प्राधिकरणको जिल्ला आयोजना कार्यान्वयन इकाइ कार्यालय बिहीबारबाट बन्द भएको छ । जिल्ला आयोजना कार्यान्वयन इकाइ कार्यालय नवलपुरका प्रमुख राजेन्द्र कार्कीले बिहीबारदेखि कार्यालय बन्द भएको बताए ।
नवलपुरसहित देशका ३१ वटै जिल्लाका इकाइ कार्यालय बन्द भएका हुन् । इकाइ कार्यालय बन्द भएपछि पुनर्निर्माण गर्न बाँकी रहेका सेवाग्राहीहरु अलपत्र परेका छन् । पूर्वी नवलपरासी र पश्चिम नवलपरासी हेर्ने कावासोतीमा रहेको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ कार्यालय र जिल्ला आयोजना कार्यान्वयन इकाइ (शिक्षा) कार्यालय दुवै बिहीबारबाट बन्द भएको छ ।
जिल्ला आयोजना कार्यान्वयन इकाइ कार्यालय नवलपुरले कार्यालयमा रहेका जिन्सी तथा फर्निचरहरु चितवनमा रहेको सघन सहरी विकास तथा भवन निर्माण आयोजनालाई हस्तान्तरण गरेको छ । ७८ जना नयाँ लाभग्राही अलपत्र कार्कीका अनुसार नवलपरासीमा ७८ जना पछिल्लोपटक पुनरावेदनको क्रममा भूकम्पबाट भौतिक संरचना क्षति भएको भनी लाभग्राही कायम भई आएका थिए । उनीहरुसँग सरकारले कुनै सम्झौता गरेको छैन भने निजी आवास निर्माणका लागि कुनै रकम पनि उपलब्ध गराएको छैन ।
बुलिङटारमा २१ जना, मध्यविन्दुमा १२ जना, हुप्सेकोटमा १२ जना, देवचुलीमा ११ जना, गैँडाकोटमा १२ जना, बौदीकालीमा ५ जना गरी ७८ जना नयाँ लाभग्राही कायम भएका थिए । उनीहरु लाभग्राही कायम भए पनि राष्ट्रिय पुनर्निर्माण प्राधिकरणअन्तर्गतको जिल्ला आयोजना कार्यान्वयन इकाइ कार्यालय बन्द भएपछि सेवा लिन कहाँ जाने भन्नेमा अलपत्र परेका छन् । नवलपरासीमा यसअघि निजी आवासतर्फ १ हजार ९९ जना सेवाग्राही कायम भएकोमा १ हजार ८६ जना अर्थात् ९८ दशमलब ८ प्रतिशतले निजी आवास निर्माण सम्पन्न गरेका थिए ।
बाँकी १३ जना सम्पर्कमा नआएको तथा सम्पर्कमा आउन नचाहेका थिए । पुल निर्माणको ४२ लाख भुक्तानी बाँकी देवचुली नगरपालिकाको १२ र ५ नम्बर वडा जोड्ने पक्की पुल पनि आयोजनाले निर्माण गरेको छ । उक्त पुलको अझै ४२ लाख भुक्तानी दिन बाँकी रहेको छ । त्यसैगरी, नवलपरासीमा ११ वटा गुम्बा भूकम्पले क्षति भएकोमा ८ वटा गुम्बा पुनर्निर्माण भएको, १ वटा निर्माणाधीन अवस्थामा रहेको र २ वटाले भवन निर्माण गर्न अनिच्छा देखाएको कार्कीले बताए ।
१४ जना कर्मचारीको बिचल्ली यसअघि राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ कार्यालय नवलपुरमा रहेका १६ जना कर्मचारीमध्ये २ जना स्थायी कर्मचारी अन्यत्र सरूवा भए पनि बाँकी १४ जना कर्मचारी भने बिचल्लीमा परेका छन् । झन्डै ५ वर्ष सेवा गरेका ती कर्मचारी स्थायी नभएको र कार्यालयसमेत बन्द भएका कारण बिचल्लीमा परेका हुन् । चितवन पोष्ट्बाट
