स्पेनिस महारथी क्लब रियल म्याड्रिड झन्डै १९ महिनापछि आफ्नो घरेलु मैदान सान्टियागो बर्नाबेउमा फर्कदैछ । स्पेनिस ला लिगामा आज (आइतबार) रियलले सेल्टा डि भिगोको आतिथ्यता गर्दाको खेल यही ‘आइकोनिक’ सान्टियागो बर्नाबेउमा हुनेछ । खेल नेपाली समयअनुसार राति १२:४५ बजे हुनेछ ।
रियलले बर्नाबेउमा अन्तिमपटक ५ सय ६० दिन अघि अर्थात १ मार्च २०२० मा ‘एल क्लासिको’ मा बार्सिलोनासँग प्रतिस्पर्धा गरेको थियो । जिनेदिन जिदानको प्रशिक्षणमा भिनिसियस जुनियर र मारियानो डियाजको गोलमा रियलले २–० को जित रचेको थियो ।
कोरोना भाइरस संक्रमणको महामारीका बेला रंगशालामा दर्शक प्रवेशमा निषेध भएपछि रियलले त्यसको फाइदा उठाएर बर्नाबेउको पुर्ननिर्माण गरेको थियो । बर्नाबेउ पुनर्निर्माणबाट गुज्रिएपछि रियलले भाल्डेवेवासमा रहेको प्रशिक्षण मैदान अल्फ्रेडो डि स्टेफानोमा गत सिजनको पुरै र त्यसअघिको केही खेल भएको थियो ।
अबको अवसरलाई लिएर रियल म्याड्रिडका अध्यक्ष प्रशिक्षक फ्लोरेन्टिनो पेरेजले फेरि एकपल्ट सान्टियागो बर्नाबेउमा फुटबल फर्कदै र यो निकै रोमाञ्चक स्थिति रहेको बताएका छन् । उनले यो अवधि हाम्रो लागि मात्र नभई सबैको लागि कठिन रहेको थपे ।
झन्डै १९ महिनापछि बर्नाबेउ तयार हुदा स्टेडियममा एकैपल्ट सबैलाई प्रवेशका लागि अवसर भने दिइने छैन् । कोभिड प्रोटोकलका कारण सीमित दर्शकलाई मात्रै रंगशालामा प्रवेश दिइनेछ । पहिलो खेलमा रियलले रंगशाला निर्माण गर्दा काम गरेका कर्मचारीले निशुल्क प्रवेश दिने भएको छ ।
