तेक्वान्दो खेलाडी पलेशा गोवर्धन श्रेष्ठले नेपाललाई पहिलो ओलिम्पिक पदक दिलाउन सक्ने आशा प्रशिक्षकहरूले गरेका छन्।
ओलिम्पिक्समा खेलेको ५७ वर्ष लामो इतिहास होस् वा १० वर्षअगाडि देखि खेल्न थालेको पारा-ओलिम्पिक्समा नेपालले अझै अहिलेसम्म ओलिम्पिक खेलबाट पदक प्राप्त गर्न सकेको छैन।
यसपालि पारा-तेक्वान्दो खेलाडी पलेशाबाट नेपाली पक्षले ठूलो आशा राखेको छ।
पलेशा दुईवटा विश्व पारा-तेक्वान्दो च्याम्पियनशिप र तीनवटा एशियन पारा-तेक्वान्दो च्याम्पियनशिपमा प्रतिस्पर्धा गरिसकेकी अनुभवी खेलाडी हुन्।
दुई वर्षअगाडि भियतनाममा भएको एशियन पारा-च्याम्पियनशिपमा उनले कांस्य पदक जितेकी थिइन्।
पलेशाले यही भदौ १८ गते के ४४ विधाअन्तर्गत ५८ केजीमुनिको तौल समूहमा प्रतिस्पर्धा गर्दैछिन्।
के ४४ भनेको “एउटा हातको कुहिना भन्दा तलको भाग नहुने” खेलाडीको विधा हो।
टोकियोमा पलेशालाई प्रशिक्षण दिइरहेका तेक्वान्दो प्रशिक्षक दीपक विष्ट भन्छन्, “पलेशामा प्रतिभा त छ नै, उनको आत्मविश्वास अझ दरिलो छ। प्रतिद्वन्द्वीहरू पनि उनका लागि नौला होइनन्। त्यसैले उनी पदकको दाबेदारीको सूचीमा अगाडि छिन्।”
पारा-ओलिम्पिक्स भनेको अपाङ्गता भएका खेलाडीहरूले खेल्ने प्रतियोगिता हो।
