काठमाण्डाै – अफगानिस्तानमा रहेका अमेरिकी सेना फिर्ताको समयसीमा लम्ब्याउन दबाब बढेको छ ।
अमेरिकी राष्ट्रपति जो बाइडेनले अगष्ट महिनाको अन्त्यपछि अफगानिस्तानमा सैनिक राख्ने या नराख्नेबारे छिट्टै निर्णय लिने बताउनुभएको छ । राष्ट्रपति बाइडेनलाई साझेदारहरूले थप मानवीय उद्धार जारी राख्नुपर्ने भएकाले काबुल विमानस्थलबाट फौज फिर्ता नगर्न दबाब दिइरहेका छन् ।
जी–सेभेनको शीर्ष बैठकमा यो विषय प्रमुख एजेण्डा बन्ने भएको छ । तालिबानले अर्को हप्ताभन्दा पछिसम्म अमेरिकी सेना बस्न खोजे त्यसको परिणाम राम्रो नहुने चेतावनी दिइरहेका छन् । पछिल्लो २४ घण्टामा झन्डै १६ हजार मानिसको उद्धार गरिएको छ ।
अगष्ट १४ यता उद्धार हुनेको सङ्ख्या ३७ हजार पुगेको छ । स्थल सीमाबाट पनि आवतजावत सहज बनाउन अफगानिस्तानका छिमेकी देशसँग पनि कुराकानी भइरहेको अधिकारीलाई उदृत गरि बीबीसीले जनाएको छ ।
यसअघि आफ्ना साझेदारबाट उद्धारको समयसीमालाई बढाउन माग गरिएको भए पनि अमेरिकाले उद्धार कार्य तोकिएकै समयमा सम्पन्न गर्ने बताउँदै आएको थियो । अमेरिकी रक्षा मन्त्रालय पेन्टागनले आफू अझै पनि समयसीमा परिवर्तनको पक्षमा नरहेको जनाउँदै आएको छ ।
तालिबानले पनि समयसीमा बढाउनुले सहमतिको उल्लङ्घन हुने जनाएको समाचार संस्था रोयटर्सले जनाएको छ ।
