बैशाख १८, काठमाडौं । नेपाली कांग्रेसका सभापति शेरबहादुर देउवाले सरकारको लापर्बाहीका कारण तथा विगतको गल्तीबाट पाठ नसिक्दा कोरोना संक्रमणको अवस्था बढ्दो गतिमा पुगेको भन्दै रोकथाम तथा नियन्त्रणका लागि ११ सुझाव दिएका छन् ।
आफ्नो निजी निवास बुढानीलकण्ठमा शुक्रबार पत्रकारसम्मेलन गर्दै देउवाले सरकारको चरम लापर्बाही, असंवेदनशीलता र अकर्मण्यताका कारण कोरोना महामारी व्यापक रूपमा फैलिएको आरोप लगाए । सरकारले विगतबाट पाठ नसिक्दा तथा उद्घाटन, भीडभाड र तडकभडकमा व्यस्त रहँदा कोरोना रोकथाम तथा नियन्त्रणतर्फ कुनै ठोस काम नभएर यस्तो अवस्था आएको देउवाले भनेका छन् ।
‘संक्रमितहरूको उपचार गर्न देशको स्वास्थ्य संरचनाले धान्नै नसक्ने स्थिति बनेको छ, बढ्दो संक्रमणसँगै आईसीयू बेड, भेन्टिलेटर र अक्सिजनको टड्कारो अभाव देखिन थालेको छ, यस्तो परिस्थिति आउनुमा सरकारको चरम लापर्बाही, असंवेदनशीलता र अर्कमन्यता जिम्मेवार छ,’ देउवाले पत्रकार सम्मेलनमार्फत भने ।
देउवाले संक्रमण व्यापक रूपमा बढेको भन्दै आवश्यक आईसीयू बेड, अक्सिजन, औषधी र भेन्टिलेटरको तत्काल व्यवस्था मिलाउनेतर्फ ध्यान दिन सरकारलाई आग्रह गरेका छन् । अत्यावश्यक अक्सिजन भेन्टिलेटरको आपूर्ति तत्काल सुनिश्चित गरियोस्, अस्पतालमा आईसीयू बेड, आवश्यक औषधिको तत्काल समुचित व्यवस्था गरियोस्, कन्ट्रयाक टेसिङलाई व्यापक बनाइयोस्,’ देउवाले पत्रकार सम्मेलनमार्फत सरकारलाई सुझाउँदै भने ।
यस्तै, सीमा नाकाबाट आएकाहरूमा परीक्षण बढाउन र परीक्षणपछि उनीहरूलाई होल्डिङ सेन्टरमा राख्ने व्यवस्था मिलाउन, स्वास्थ्यकर्मी, सफाइकर्मी, सुरक्षाकर्मीलाई बिमा र जोखिम भत्ताको व्यवस्थाको प्रबन्ध तत्काल गर्न पनि देउवाले सरकारलाई आग्रह गरेका छन् ।
यस्तै, बढ्दो संक्रमणसँगै स्वास्थ्य जनशक्तिको अभाव देखिएकाले अस्पतालमा थप स्वास्थ्य जनशक्तिको व्यवस्था गर्न पनि माग गरेका छन् । काठमाडौं उपत्यकालगायतका ठाउँमा लकडाउनको निर्णयपछि उपत्यका छाड्ने समय दिएपछि संक्रमित गाउँगाउँ पुगेको भन्दै देउवाले सबैलाई सुरक्षित रहनसमेत आग्रह गरेका छन् ।
देउवाले खोप आपूर्तिका लागि व्यवस्था गर्नेतर्फ तत्काल पहल गर्नसमेत सरकारलाई सुझाएका छन् । यस्तै, लकडाउनका कारण आर्थिक सामाजिक रूपमा मारमा परेकाहरूका लागि आवश्यक कार्ययोजना ल्याउनसमेत देउवाले सरकारको ध्यानाकर्षण गराएका छन् ।
उनले केन्द्रदेखि गाउँसम्मका पार्टीका सबै संरचनालाई कोरोनाविरुद्ध सचेतना अभियानमा परिचालित हुन निर्देशनसमेत दिएका छन् भने आर्थिक तथा सामाजिक रूपमा समस्यामा परेकालाई सहयोग गर्ने अभियान चलाउनसमेत पार्टी पंक्तिलाई निर्देशन गरेका छन् ।
यसैगरी, अमेरिकालाई खोप सहयोग गर्ने निर्णय गरेकामा धन्यवाद दिए । यसअघि भारत र चीनलाई पनि नेपाललाई खोप सहयोग गरेकोमा धन्यवाद दिए । देउवाले आफ्ना देशका नागरिकका लागि अग्रिम खोपको मात्रा बुक गरी सुरक्षित गरिराखेका देशलाई समेत बुक गरिएको कोटाबाट केही डोज नेपाललाई उपलब्ध गराउनसमेत आग्रह गरे ।
