काठमाडौं । आगामी निर्वाचनलाई लक्षित गर्दै जेनजी २.० ले आफ्नो औपचारिक धारणा सार्वजनिक गरेको छ। जेनजी २.० का प्रवक्ता अविन लिम्बुले संगठनले निर्वाचनमा सहभागी हुने उम्मेदवारहरूलाई उनीहरूको दक्षता, क्षमता, अनुभव तथा सार्वजनिक उत्तरदायित्वका आधारमा सहयोग गर्ने निर्णय गरेको जानकारी दिए।
उनका अनुसार सहयोग पार्टीगत पहिचान वा “नयाँ–पुरानो” विभाजनमा आधारित हुने छैन। “हामीका लागि मुख्य कुरा योग्यतामूलक मूल्याङ्कन र जनहितप्रतिको स्पष्ट प्रतिबद्धता हो,” उनले भने। अबको आवश्यकता नारामुखी राजनीतिभन्दा सक्षम र परिणाममुखी नेतृत्व चयन गर्नु रहेको उनको भनाइ छ।
प्रवक्ता लिम्बुले जेनजी २.० ले कुनै पनि उम्मेदवारलाई समर्थन वा सहकार्य गर्नुअघि लिखित सहमति गर्ने स्पष्ट पारे। उक्त सहमतिमा जनउत्तरदायित्व, पारदर्शिता, सुशासन र जनतासँग गरिएका प्रतिबद्धताप्रति स्पष्ट अडान समेटिने उनले बताए। “राजनीतिक परिवर्तन केवल भाषणबाट सम्भव हुँदैन, स्पष्ट कार्ययोजना र जवाफदेहिताबाट मात्र सम्भव हुन्छ,” उनले जोड दिए।
जेनजी २.० ले समर्थनको निर्णय गर्दा स्पष्ट मापदण्ड, लिखित प्रतिबद्धता र जनहितलाई पहिलो प्राथमिकतामा राख्ने पनि जनाएको छ। साथै सबै उम्मेदवारहरूलाई स्वच्छ, पारदर्शी र मुद्दामुखी प्रतिस्पर्धाका लागि आह्वान गरिएको छ।
यसैबीच, भोलि मनाइने महाशिवरात्रि पर्वका अवसरमा जेनजी २.० का सम्पूर्ण टिम समूहले पशुपतिनाथ मन्दिर परिसरमा भीड व्यवस्थापन तथा स्वयंसेवकको भूमिकामा खटिने जानकारी पनि प्रवक्ता लिम्बुले दिएका छन्। उनले महाशिवरात्रिको अवसरमा सम्पूर्णमा शुभकामना व्यक्त गरेका छन्।
