डिकेन्द्र बस्नेत, काभ्रेपलान्चोक । नेपाली कम्युनिस्ट पार्टी (नेकपा) काभ्रे प्रतिनिधि सभा निर्वाचन क्षेत्र नम्बर २ को पाँचौँ दिनको घरदैलो अभियान बनेपा नगरपालिकामा सञ्चालन भएको छ।
शुक्रबार बिहानदेखि सुरु भएको मतदाता भेटघाट कार्यक्रममा नेकपाका उम्मेदवार बसुन्धरा हुँमागाईलाई तारा चिन्हमा मतदान गर्न स्थानीय नागरिकहरूले आग्रह गरेका छन्।
जनताका प्रिय उम्मेदवारप्रति स्वस्फूर्त समर्थन जनाउँदै नालास्थित चौतारीका चामुण्डा भजन समूहले पनि भजनमार्फत मतदातालाई मतदान गर्न आह्वान गरेको थियो।
बनेपा नगरपालिका वडा नम्बर ३, चौतारामा आयोजित मतदाता भेटघाट कार्यक्रममा प्रस्तुत गरिएको गीतमार्फत “पानी खुवाउने नेतालाई भोट दिने” सन्देश दिँदै उम्मेदवार हुँमागाईप्रति समर्थन व्यक्त गरिएको हो।
स्थानीयले फुलमाला र टीका लगाएर स्वागत गर्नुका साथै बाटो–बाटोमा पानीका कलस र घडा राखी सत्कार गरेका थिए, जसले चोक र सडक क्षेत्रमा विशेष रौनकता थपेको थियो।
प्रतिनिधि सभा निर्वाचन क्षेत्र नम्बर २ का निर्वाचन परिचालन समितिका संयोजक टोकबहादुर वाईबाको नेतृत्वमा उम्मेदवार हुँमागाईसहितको टोलीले बनेपा नगरपालिका वडा नम्बर १, २ र ३ का विभिन्न स्थानमा घरदैलो गर्दै मतदातासँग प्रत्यक्ष भेटघाट गरेको हो।
सो क्रममा स्थानीय मतदाताहरूले उम्मेदवारलाई भव्य स्वागत गरेका थिए। मतदाताहरूले स्वच्छ छवि, सरल स्वभाव र काम गर्ने नेताका रूपमा परिचित हुँमागाईलाई तारा चिन्हमा मतदान गरी विजयी गराउने प्रतिबद्धता व्यक्त गरेका छन्।
स्थानीयका अनुसार उहाँको पहलमा सडक कालोपत्रे, पुल, कुलो र धारा निर्माण जस्ता विकास कार्यहरू सम्पन्न भएका छन्।
निर्वाचन नजिकिँदै गर्दा उम्मेदवार हुँमागाई पार्टी संगठनका जिम्मेवार नेताहरूसहित बनेपा नगरपालिका नाला क्षेत्रमा पुगेका हुन्।
सो अवसरमा उनले आफू सधैं जनताको साथमा रहेको र जनताको सुख–दुःखमा सहभागी हुँदै आएको उल्लेख गर्दै आगामी दिनमा पनि जनतासँगै अघि बढ्ने प्रतिबद्धता व्यक्त गरे।
आगामी निर्वाचनमा तारा चिन्हमा मतदान गर्न आग्रह गर्दै उनले विजयी भएपश्चात् विकास निर्माणसम्बन्धी योजनाहरूलाई पूर्णता दिने जिम्मेवारी लिने प्रतिबद्धता समेत जनाएका छन्।
नाला क्षेत्रका मतदाताहरूले पनि स्वच्छ छवि, जनताको भावना बुझ्ने र आवश्यकताको पूर्ति गर्न सक्ने सरल तथा कर्मठ उम्मेदवारलाई मतदान गर्ने बताएका छन्।
