काभ्रेपलान्चोक । काभ्रे क्षेत्र नं. २ बाट नेपाली कम्युनिस्ट पार्टीका प्रतिनिधि सभा सदस्य उम्मेदवार बसुन्धरा हुमागाईले बेथानचौक गाउँपालिकाबाट घरदैलो तथा भेटघाट अभियान सुरु गर्नुभएको छ।
आइतबार निर्वाचन क्षेत्र नं. २ अन्तर्गत बेथानचौक गाउँपालिकाको वडा नं. १ च्याम्राङवेशीका मतदाताको घरदैलोमा पुगेर उहाँले आफ्ना धारणा राख्दै मत दिन आग्रह गर्नुभएको हो।
बेथानचौक पुगेको घरदैलो अभियान टोलीले सर्वप्रथम वडा नं. ४ मा पार्टीको वडा कार्यालय उद्घाटन गरी अभियानको सुरुआत गरेको थियो। त्यसपछि पार्थलीमा भेटघाट कार्यक्रम सम्पन्न गरिएको थियो भने ढुंखर्कमा वडा नं. २ को पार्टी कार्यालय उद्घाटन गरिएको थियो। साथै, वडा नं. १ मा पनि पार्टीको वडा कार्यालय उद्घाटन गरिएको थियो।
सो क्रममा हुमागाई नेतृत्वको टोलीले झिंगे, फुर्केथलीलगायत वडा नं. १ का सबै गाउँबस्तीमा पुगेर मतदातासँग प्रत्यक्ष भेटघाट गरेको छ। च्याम्राङवेशी पुगेको टोलीलाई त्यहाँका स्थानीय नागरिकले यसपटक तारा चिन्हमा मतदान गर्ने निर्णय गरेको र सोहीअनुसार मत दिने प्रतिबद्धता व्यक्त गरेका थिए। भेटघाटका क्रममा मतदाताले आफ्ना गाउँ–टोलका विभिन्न समस्याबारे जानकारी गराउँदै समाधानका लागि आग्रहसमेत गरेका थिए।
यसैबीच, नेपाली कम्युनिस्ट पार्टी काभ्रेपलाञ्चोक जिल्लाको निर्वाचन क्षेत्र नं. २ अन्तर्गत बुधबार सम्पन्न निर्वाचन परिचालन कमिटीको भेला तथा बैठकले पार्टी केन्द्रीय सदस्य टोकबहादुर वाइवाको संयोजकत्वमा निर्वाचन परिचालन मूल कमिटी गठन गरी औपचारिक रूपमा निर्वाचन अभियान थालनी गर्ने निर्णय गरेको छ।
अभियानका क्रममा हुमागाईले गत असोज ११ र १२ गते आएको बाढीका कारण ठूलो धनजनको क्षति हुनुका साथै धेरै नागरिक विस्थापित भएको उल्लेख गर्नुभयो। आफू निर्वाचित भएमा ती समस्यालाई संघीय संसदमा उठाई समाधानका लागि प्राथमिकताका साथ पहल गर्ने प्रतिबद्धता उहाँले व्यक्त गर्नुभयो।
साथै, सो क्षेत्रमा अधुरा रहेका विकास–निर्माणका योजनाहरूलाई प्राथमिकतामा राखी समयमै सम्पन्न गरिने हुमागाईले बताउनुभयो।
