संघर्ष, संगठन र सेवाको निरन्तर यात्रा ” मैले चिनेकाे”
खोटाङ कांग्रेसका नेता वीरकाजी राई:
दिपेश श्रेष्ठ। राजनीति केवल पद र शक्ति प्राप्तिको साधन होइन, यो जनताको दुःख–सुखसँग प्रत्यक्ष जोडिने जिम्मेवारीपूर्ण सेवा हो। यही मान्यतालाई आत्मसात् गर्दै विगत तीन दशकदेखि नेपाली कांग्रेसको संगठन निर्माण, लोकतन्त्रको रक्षा र खोटाङ जिल्लाका नागरिकको पक्षमा निरन्तर क्रियाशील नेता हुन् वीरकाजी राई। नेपाली कांग्रेसले खोटाङबाट प्रतिनिधि सभा निर्वाचनका लागि उम्मेदवारका रूपमा अघि सारेका राई जिल्लामा एक निष्ठावान्, अनुभवी र संगठनमा खारिएका नेताका रूपमा परिचित छन्।
वीरकाजी राईको जन्म २०३१ साल कात्तिक २५ गते खोटाङ जिल्लाको केपिलासगढी गाउँपालिका–१ (फेदी) मा भएको हो। उहाँका बुवा दलबहादुर राई र आमा ओमादेवी राई साधारण किसान परिवारका सदस्य हुनुहुन्थ्यो। ग्रामीण परिवेश, श्रम र अभावबीच हुर्किएका राईले बाल्यकालदेखि नै समाजप्रतिको उत्तरदायित्व, अनुशासन र संघर्षको जीवनशैली आत्मसात् गर्नुभयो। यही जीवन अनुभवले उनलाई पछि गएर जनमुखी राजनीतितर्फ डोर्यायो।
वीरकाजी राईले प्रारम्भिक शिक्षा आफ्नै गाउँमा हासिल गर्नुभयो। उहाँले २०५० सालमा एसएलसी परीक्षा उतीर्ण गर्नुभयो। औपचारिक शिक्षासँगै उहाँले राजनीतिक चेतना, संगठन क्षमता र नेतृत्व विकासलाई निरन्तर अध्ययन र अभ्यासमार्फत मजबुत बनाउँदै लैजानुभयो। लोकतन्त्र, सामाजिक न्याय र समानताको मूल्य उहाँको राजनीतिक सोचको आधार बनेको देखिन्छ।
राईको राजनीतिक यात्रा २०४६/४७ सालको जनआन्दोलनपछि सक्रिय रूपमा अघि बढेको हो। लोकतन्त्र पुनःस्थापनाको आन्दोलनले उनलाई राजनीतिमा होमिन प्रेरित गर्यो। सुरुआती दिनहरूमा पार्टीको सामान्य कार्यकर्ताका रूपमा काम थालेका उनले गाउँ–गाउँमा संगठन विस्तार, पार्टीको विचार प्रचार र जनतासँगको सम्बन्ध सुदृढ गर्न महत्वपूर्ण भूमिका निर्वाह गरे।
वीरकाजी राई नेपाली कांग्रेस खोटाङका संगठनमा खारिएका नेता हुन्। उहाँले पार्टीभित्र विभिन्न जिम्मेवारी सम्हाल्दै नेतृत्व क्षमता प्रमाणित गर्नुभएको छ। नेपाली कांग्रेस खोटाङ जिल्ला सचिव, नेपाली कांग्रेस महाधिवेशन प्रतिनिधि, पार्टीका संगठन विस्तार, सदस्यता, अभियान र चुनावी रणनीतिमा सक्रिय भूमिका, पार्टी नेतृत्वप्रति निष्ठा, कार्यकर्ताप्रति सम्मान र संगठनप्रति इमानदारीका कारण राई कांग्रेसभित्र विश्वसनीय र सन्तुलित नेताका रूपमा स्थापित छन्।
राजनीति केवल भाषण र नारामा सीमित हुनु हुँदैन भन्ने मान्यता राख्ने वीरकाजी राईले जिल्लावासी नागरिकसँग प्रत्यक्ष जोडिने कामलाई प्राथमिकता दिँदै आएका छन्।
गाउँ–गाउँमा पुगेर जनसुनुवाइ र संवाद, शिक्षा, स्वास्थ्य र पूर्वाधारका विषयमा आवाज उठाउँदै सम्बन्धित निकायसम्म पहल, विपद्, समस्या र सामाजिक घटनामा पीडित परिवारको पक्षमा सक्रिय सहयोग, युवालाई राजनीतिमा सहभागी गराउँदै लोकतान्त्रिक संस्कार विकासमा योगदान, उहाँको कार्यशैली साधारण, पहुँचयोग्य र जनमैत्री रहेको जिल्लावासीको बुझाइ छ।
प्रदेश र संघीय संरचना लागू भएसँगै खोटाङ जस्तो भौगोलिक रूपमा चुनौतीपूर्ण जिल्लाका मुद्दाहरू राष्ट्रिय तहमा उठाउनु आवश्यक थियो। वीरकाजी राईले खोटाङको सडक, शिक्षा, स्वास्थ्य, खानेपानी र रोजगारीका सवाललाई राष्ट्रिय एजेन्डासँग जोड्ने प्रयास, प्रदेश र केन्द्रका नेताहरूसँग समन्वय गर्दै जिल्लाका मागहरू अघि सार्ने भूमिका खोटाङको विकास सम्भावनालाई नीति तहमा स्थापित गर्ने दृष्टिकोण प्रस्तुत गर्दै आएका छन्।
हाे, यहि अनुभव र दक्षतालाई मूल्यांकन गर्दै आगामी फागुन २१ मा सम्पन्न हुने प्रतिनिधि सभा निर्वाचनका लागि वीरकाजी राईलाई उम्मेदवार बनाउनु संगठन, संघर्ष र निरन्तरताको सम्मानका रूपमा हेरिएको छ।
खोटाङका दीर्घकालीन विकास योजनालाई संसदमा प्राथमिकता, युवाको रोजगारी, कृषिमा आधुनिकीकरण र शिक्षा–स्वास्थ्य सुधार, संघीय बजेट र नीतिमा खोटाङको न्यायोचित हिस्सा सुनिश्चित गर्ने प्रतिबद्धता रहेकाे देखिन्छ। राईको उम्मेदवारीलाई जिल्लामा अनुभव र नयाँ ऊर्जा दुवैको संयोजनका रूपमा हेरिएको छ।
वीरकाजी राई संघर्षबाट खारिएको, संगठनबाट उठेको र जनताबाट विश्वास जितेको नेता हुन्। उहाँको राजनीतिक यात्रा व्यक्तिगत महत्वाकांक्षाभन्दा माथि उठेर खोटाङको समग्र विकास र लोकतान्त्रिक मूल्यको संरक्षणतर्फ केन्द्रित देखिन्छ। प्रतिनिधि सभा निर्वाचनमा उनको भूमिका खोटाङको भविष्यसँग प्रत्यक्ष जोडिने विश्वास धेरै नागरिकले गरेका छन्।
