दिपेश श्रेष्ठ । नेपाली इसाई मण्डली—ज्ञानेश्वर चर्च (नेइम, ललितपुर) का सक्रिय सदस्य अन्जन घले पछिल्लो करिब तीन दशकदेखि निरन्तर सेवकाइमा समर्पित एक बहुप्रतिभाशाली व्यक्तित्व हुनुहुन्छ। जवान संगति अगुवा, बालसंगति शिक्षक, आराधना अगुवा, प्रचारक तथा शिक्षक पुस्तक अनुवादकका रूपमा उहाँले मण्डलीभित्र मात्र होइन, व्यापक इसाई समुदायमा पनि उल्लेखनीय योगदान पुर्याउँदै आउनुभएको छ।
जीवनका उकाली–ओरालीमा आइपरेका अनेक दुःख, समस्या र चुनौतीका बीच पनि परमेश्वरको बोलावटलाई आत्मसात् गर्दै अडिग रहनु उहाँको जीवनको मूल विशेषता हो। परिस्थितिले थकित बनाउने क्षणहरूमा समेत सेवकाइबाट नडग्मगाई निरन्तर अघि बढ्नु अन्जन घलेको आस्थागत दृढता र समर्पणको स्पष्ट उदाहरण हो।
रंगमञ्चबाट आफ्नो कलायात्राको सुरुआत गर्नुभएका घलेले “आस्थामा बाँच्नेहरू” नामक इसाई चलचित्रमार्फत इसाई चलचित्र सेवकाइमा प्रवेश गरी करिब १२ ओटा इसाई चलचित्रमा मुख्य भूमिकामा अभिनय गर्नुभएको छ । उहाँले अभिनय गर्नुभएको चलचित्र “जीवनको पुस्तक” विशेष रूपमा स्मरणीय बनेको छ। उक्त चलचित्रमा यमराजको भूमिकामा देखिनुभएका घलेको अभिनय आज पनि इसाई समुदायले सम्झने र चर्चा गर्ने गरेको पाइन्छ।
परमेश्वरले दिनुभएको बहु–वरदानलाई प्रभावकारी रूपमा प्रयोग गर्दै घले हाल पुस्तक अनुवाद, आराधना अगुवाई, वचन प्रचार, शिक्षण, संगीत सर्जना तथा संगीत शिक्षकका रूपमा सक्रिय रहनुभएको छ। संगीतकार, गीतकार र अनुवादकका रूपमा समेत उहाँको योगदान उल्लेखनीय छ, जसले इसाई सेवकाइलाई थप सशक्त बनाएको छ।
शैक्षिक पृष्ठभूमिका हिसाबले अन्जन घलेले त्रिभुवन विश्वविद्यालयबाट सामाजिकशास्त्रमा स्नातक तह पूरा गर्नुभएको छ भने ईश्वरशास्त्रमा एमडिभ (Master of Divinity) अध्ययनसमेत सम्पन्न गर्नुभएको छ। शिक्षा र सेवकाइलाई सँगसँगै अघि बढाउँदै उहाँले व्यावहारिक र आत्मिक दुवै क्षेत्रमा सन्तुलित योगदान दिँदै आउनुभएको छ।
स्वर्गीय कान्छा घले तथा स्वर्गीय सानु घलेका जेठा सुपुत्र अन्जन घलेको एक विवाहित बहिनी र एक भाइ हुनुहुन्छ। उहाँको श्रीमती गीता श्रेष्ठ तथा छोरा सान्वृत श्रेष्ठ घलेसँगै उहाँ एक जिम्मेवार पारिवारिक व्यक्ति र समर्पित सेवकको रूपमा परिचित हुनुहुन्छ।
आस्था, संघर्ष र सेवकाइको सुन्दर संयोजनका रूपमा अन्जन घले आज पनि निरन्तर सक्रिय हुनुहुन्छ—जसले नेपाली इसाई समाजमा प्रेरणाको स्रोत बनेर धेरैलाई उत्साहित गरिरहेको छ।
