काभ्रेपलाञ्चोक । काभ्रे निर्वाचन क्षेत्र नं. २ बाट नेपाली कम्युनिष्ट पार्टीका उम्मेदवार तथा वागमती प्रदेशका पूर्व कृषि मन्त्री बसुन्धरा हुमागाईले पाँचखाल नगरपालिकालाई कृषिको ‘हब’का रूपमा विकास गर्ने स्पष्ट प्रतिबद्धता व्यक्त गर्नुभएको छ।
आइतबार पाँचखालमा पार्टीको नगर कार्यालय उद्घाटन कार्यक्रमलाई सम्बोधन गर्दै उहाँले पाँचखालको उर्वर भूमि, अनुकूल भौगोलिक अवस्था र कृषिमा आधारित जीवनशैलीलाई ध्यानमा राखी आधुनिक, व्यावसायिक तथा उत्पादनमुखी कृषि विकासको योजना अघि सार्नुभएको हो।
पूर्व मन्त्री हुमागाईले पाँचखाललाई खानेपानी अभावमुक्त बनाउन सुरु गरिएको सुनकोशी–पाँचखाल खानेपानी आयोजनामा आफ्नो महत्वपूर्ण योगदान रहेको उल्लेख गर्दै कृषकलाई उत्पादनका आधारमा अनुदान प्रदान गर्ने, पशु स्वास्थ्य क्लिनिक विस्तार गर्ने तथा कृषि उत्पादन भण्डारणका लागि गोदाम निर्माणजस्ता योजनालाई प्राथमिकतामा राख्ने बताउनुभयो।
