कृष्ण कुँवर (कर्नेलियस)। पर्वतको फलेवास नगरपालिका–२, थापाठानामा जन्मिएकी सनम बेगम पछिल्लो समय राष्ट्रिय राजनीतिमा चर्चामा आउन थालेकी छन्।
बुबा अलि ज्यान मिया र आमा रहिमुन मियाको कोखबाट जन्मिएकी सनम बेगमले थापाठानाबाटै आफ्नो राजनीतिक यात्रा सुरु गरेकी हुन्। आफूले बुबा अलि ज्यान मियाबाट राजनीतिक संस्कार प्राप्त गरेको उनले बताएकी छन्।
हालै सम्पन्न नेपाली कांग्रेसको महाधिवेशनपछि सार्वजनिक गरिएको प्रतिनिधि सभा निर्वाचनको समानुपातिक सांसद सूचीमा पर्वत जिल्लाबाट उनको नाम समावेश भएपछि उनी सम्भावित सांसदका रूपमा अगाडि बढेकी छन्।
मुस्लिम समुदायसँग सम्बन्धित सनम बेगम नेपालको संविधानले परिभाषित गरेको अल्पसंख्यक समुदायअन्तर्गत पर्छिन्।
समानुपातिक सूचीमा समावेश भएपछि पार्टीले आफूलाई न्याय गरेको अनुभूति भएको सनमले प्रतिक्रिया दिएकी छन्।
पहाडी जिल्ला पर्वतबाट प्रतिनिधित्व गर्ने महिलाका रूपमा उनको उपस्थितिलाई कांग्रेसको समावेशी राजनीतिक रणनीतिसँग जोडेर हेरिएको छ। कांग्रेसको संगठनात्मक राजनीतिमा सक्रिय रहँदै आएकी बेगम पार्टीका विभिन्न गतिविधिमा निरन्तर संलग्न रहँदै आएकी छन्।
महिला सहभागिता, सामाजिक न्याय र समावेशी प्रतिनिधित्व उनका प्रमुख सरोकारका विषय हुन्। पार्टीभित्र अल्पसंख्यक तथा सीमान्तकृत समुदायका मुद्दा उठाउँदै आएकी उनी पछिल्लो समय केन्द्रीय राजनीतिमा स्थापित हुने क्रममा देखिन्छिन्।
समानुपातिक सूचीमा उनको समावेश केवल व्यक्तिगत उपलब्धि मात्र नभई पर्वतीय भूगोल, महिला तथा अल्पसंख्यक समुदायको प्रतिनिधित्वका रूपमा पनि अर्थपूर्ण मानिएको छ। यसले नेपाली कांग्रेसभित्र विविधता र समावेशीतालाई प्राथमिकतामा राख्ने प्रयासलाई संकेत गर्छ।
संसदमा पुग्ने अवसर प्राप्त भएमा बेगमले शिक्षा, स्वास्थ्य, रोजगारी तथा सामाजिक समानताका विषयलाई प्राथमिकतामा राख्ने बताउँदै आएकी छन्। विशेषतः मुस्लिम तथा अन्य अल्पसंख्यक समुदायका समस्या राष्ट्रिय तहमा उठाउने उनको लक्ष्य रहेको बताइन।
थापाठानाको स्थानीय परिवेशबाट राष्ट्रिय राजनीतिसम्म आइपुगेकी सनम बेगमको यात्रा नेपाली राजनीतिमा समावेशी प्रतिनिधित्वसम्बन्धी बहससँग गाँसिएको छ। उनको राजनीतिक भविष्य कांग्रेसको निर्वाचन परिणामसँगै तय हुनेछ।
यसैबीच, पर्वतको फलेवास नगरपालिका–२, थापाठानाका स्थानीय बासिन्दाहरूले उनलाई सांसदको रूपमा हेर्न चाहेको प्रतिक्रिया दिएका छन्।
