काठमाडौं । मकवानपुर–२ बाट तीन महिनादेखि स्वतन्त्र उम्मेदवारीका लागि सक्रिय चुनावी अभियान सञ्चालन गरिरहेका युवा नेता शिव प्रसाद अधिकारीले आफ्नो उम्मेदवारी फिर्ता लिने घोषणा गर्दै राष्ट्रिय स्वतन्त्र पार्टी (रास्वपा) मा प्रवेश गरेका छन्।
यो निर्णय रास्वपा सभापति रवि लामिछानेले न्याय प्राप्त गर्नुको दिन सार्वजनिक भएको हो। अधिकारीले व्यक्तिगत आकांक्षा भन्दा माथि उठेर देशमा सकारात्मक परिवर्तन, सुशासन र सही राजनीतिलाई बलियो बनाउने उद्देश्यले रास्वपामा प्रवेश गरेको बताएका छन्।
उक्त अवसरमा शिव प्रसाद अधिकारीले भने, “मकवानपुर–२ बाट स्वतन्त्र उम्मेदवारी घोषणा गरेर केही महिना चुनावी तयारी गरिसकेको थिएँ। तर आजको परिस्थिति र देशको हितलाई ध्यानमा राख्दै, मैले आफ्नो उम्मेदवारी फिर्ता गर्दै रास्वपामा प्रवेश गर्ने निर्णय गरेको हुँ। यस निर्णयले देश र जनताको हितमा ठोस योगदान पुग्ने विश्वास लिएको छु।”
रास्वपा प्रवेशसँगै अधिकारीले आफ्नो अनुभव र ऊर्जालाई पार्टीको संगठन बलियो बनाउने, क्षेत्रीय विकासमा सहयोग पुर्याउने र लोकतान्त्रिक मूल्यलाई प्रवर्द्धन गर्ने उद्देश्यका लागि प्रयोग गर्ने बताएका छन्।
यो घटनाले मकवानपुर–२ को चुनावी वातावरणमा नयाँ रणनीतिक मोड ल्याएको छ र आगामी चुनावमा रास्वपा प्रदर्शनमा महत्वपूर्ण प्रभाव पार्ने अपेक्षा गरिएको छ।
