काठमाडौँ । Gen Z 2.0 को आयोजनामा पौष ५ गते उद्योग, वाणिज्य तथा आपूर्तिसँग सम्बन्धित सचेत कर्तव्यबोध र जिम्मेवार पहल विषयक कार्यक्रम सम्पन्न भएको छ। कार्यक्रमको मूल सन्देश “हामी हाम्रो देश आफैँ बनाउँछौं, हामी आफ्नै क्षमतामा रोजगारी सिर्जना गर्छौं” भन्ने रहेको थियो।
कार्यक्रममा बोल्दै Gen Z 2.0 का प्रवक्ता अबिन लिम्बूले युवाहरू निराशामा होइन, उत्पादन र समाधान बोकेर अघि बढ्नुपर्नेमा जोड दिए। उनले देशभित्रै सम्भावना खोजेर उद्यम, उत्पादन र नवप्रवर्तनमार्फत रोजगारी सिर्जना गर्न सकिने स्पष्ट पारे। “माग होइन, समाधान लिएर अघि बढ्ने सोच आजको आवश्यकता हो,” उनले भने।
बित्तिय समस्या तथा समाधान बिभाग प्रमुख हरिकिशोर महतोले उद्योग र निजी क्षेत्रलाई युवामैत्री बनाउन राज्य र निजी क्षेत्रबीच सहकार्य अपरिहार्य रहेको बताए। उनले साना तथा मझौला उद्योग प्रवर्द्धन बिना रोजगारी समस्या समाधान हुन नसक्ने धारणा राखे।
कार्यक्रममा नेपाल प्याबसनको पुर्व केन्द्रिय अध्यक्ष कर्ण बहादुर शाहीले शिक्षा प्रणालीलाई उत्पादन, सीप र उद्यमसँग जोड्न नसक्दा युवा विदेशिन बाध्य भएको बताइन्। उनले व्यवहारिक शिक्षा र उद्यमशीलतालाई प्राथमिकतामा राख्नुपर्नेमा जोड दिइन्।
त्यसैगरी किर्तिपुर उद्योग बाणिज्य संघको अध्यक्ष राज्य लक्ष्मी शाक्यले राज्यको नीतिगत स्पष्टता, इमानदार कार्यान्वयन र युवाको सक्रिय सहभागिता बिना आर्थिक आत्मनिर्भरता सम्भव नहुने बताए। उनले युवाहरूले अवसर कुर्नु भन्दा अवसर सिर्जना गर्ने सोच विकास गर्नुपर्ने उल्लेख गरे।
कार्यक्रममा Gen Z 2.0 का केन्द्रीय सचिव कुन्दन कुसुवाहाले संगठनको उद्देश्य र आगामी कार्यदिशाबारे धारणा राख्दै युवालाई उद्योग, उत्पादन र स्वदेशमै रोजगारी सिर्जनामा सक्रिय रूपमा जोड्ने अभियानलाई अझ व्यापक बनाइने बताए।
कार्यक्रममा सहभागी वक्ताहरूले Gen Z 2.0 को अभियानले निराश युवा पुस्तालाई उत्पादनमुखी सोचतर्फ उन्मुख गराउँदै देशभित्रै सम्भावना खोज्न प्रेरित गरिरहेको भन्दै प्रशंसा गरे। आयोजकका अनुसार आगामी दिनमा पनि उद्योग, वाणिज्य र रोजगारीसँग सम्बन्धित यस्ता सचेतनामूलक कार्यक्रम निरन्तर गरिनेछ।
