हिमांशु राय, माेरङ। गीतकार श्रीराम राईको तेस्रो गीत ‘छैन क्यारे मेरो लागि दुख्ने मुटु पनि’ ओसियन म्युजिक नेपालको युट्युब च्यानलबाट सार्वजनिक भएको छ।
ओमप्रकाश राईले संगीतबद्ध गरेको गीतलाई गायिका पेमा शेर्पा राईले आवाज भरेकी छन्। गीतलाई सन्तोष प्रगाढ राईले एरेन्ज गरेका छन्। गीतको इडिटिङ वीरेन्द्र भाट ‘विपिन’ र मिक्सिङ–मास्टरिङ गोविन्द सोनीले गरेका छन्।
गीतले छोडी जाने व्यक्तिलाई सधैं हाँसोखुसी रहनू भन्दै शुभेच्छा प्रकट गरेको छ।
यसअघि २०७५ मा शिला खनालको आवाजमा ‘मधुमासमै मिठो साथ छुटेपछि रोएँ’ बोलेको उनको गीत रेकर्ड भएको थियो। त्यस्तै २०७९ मा मनमा बि राई र २०८१ मा नवराज पराजुलीको आवाजमा ‘सञ्चो छौ कि विसञ्चो’ बोलेको उनको गीत रेकर्ड भएका थिए।
दिक्तेल रुपाकोट मझुवागढी–७, सिर्जनाकुञ्ज, दोर्पा, खोटाङका राई पत्रकारिता तथा साहित्यमा सक्रिय छन्। उनी साहित्यका विविध विधामा कलम चलाउँछन्। ‘पोलेको मकै’ (२०७८) र ‘टोली नेता’ (२०७४) उनका प्रकाशित दुई बालकथासंग्रह हुन्।
‘लघुकथा सौन्दर्य’ फेसबुक पेजमार्फत लघुकथा विधाको उन्नयनमा सक्रिय राईका ‘आजका लघुकथा’ (२०७४) र ‘संयोग’ (२०७९) सामुहिक लघुकथासंग्रह प्रकाशित छन्। हालै राईको संयोजन तथा विमल भौकाजीको सम्पादनमा ‘बलेँसी’ सामुहिक लघुकथासंग्रह बजारमा आएको छ।
रावासावा प्राज्ञिक समाज नेपालका सचिव राई लघुकथा समाज नेपालको पहिलो शाखा खोटाङका अध्यक्ष समेत हुन्।
