इटहरी । इटहरीमा जेनजी २.० को प्रदेशस्तरिय भेला सम्पन्न भएको छ। भेला संरचनासँगै प्रदेश नेतृत्वले आफ्ना धारणा सार्वजनिक गरेपछि कार्यक्रम थप जीवन्त बनेको थियो।
भेलाले निता शाक्यलाई प्रदेश संरक्षकमा चयन गर्यो। उनले आफ्नो मन्तव्यमा प्रदेशभित्र युवाको ऊर्जा र आवाजलाई एक ठाउँमा ल्याएर परिवर्तनतर्फ अघि बढ्नुपर्ने कुरा जोर दिए। संयोजक बनेका प्रबेश पाण्डेले संरचना केवल पदका लागि नभई कामको गतिलाई बढाउन आवश्यक भएको बताए। सह–संयोजक रमेश राईले प्रदेशका स्थानीय अभियानलाई एउटै मोडेलमा लैजाने जिम्मेवारी आफूहरू तयार रहेको बताए। सदस्य–सचिव लालबहादुर बस्नेतले प्रदेश कमिटीलाई व्यवस्थापन, समन्वय र तथ्यांकसँग मजबूत बनाउने योजना प्रस्तुत गरे।
प्रदेश प्रबक्ता अक्षय कुमार चौधरी प्रबक्तामा मनोनयन भएका थिए। उनले आफू यो भूमिकामा रहेर प्रदेशका विषयहरू स्पष्ट, तथ्यपूर्ण र युवामैत्री शैलीमा सार्वजनिक गर्न प्रतिबद्ध रहेको बताए। अर्थ संयोजक बनेका देव मुण्डाले पारदर्शिता र स्रोत परिचालनलाई व्यवस्थित रूपले अघि बढाउने उद्देश्य राखे। Sudip चौधरीसहित २१ सदस्यीय प्रदेश कमिटी औपचारिक रूपमा गठन गरिएको छ।
कार्यक्रमको सञ्चालन पनि अक्षय कुमार चौधरीले गरेका थिए। शुभकामना मन्तव्य राख्दै जेनजी २.० सदस्य–सचिव कुन्दन कुसुवाले प्रदेश कमिटी गठनले संगठनलाई प्रदेशस्तरमा थप सक्षम बनाउने विश्वास व्यक्त गरे। समाजसेवी अमर इजमले जेनजी २.० को युवामैत्री आन्दोलनले समाजमा सकारात्मक प्रभाव पारिरहेको उल्लेख गरे। पलट चौधरीले संगठनले उठाएका सवालहरू जनताका वास्तविक पीडासँग जोडिएको बताए। सहिद परिवारका तर्फबाट अभिषेक श्रेष्ठका बुवाले युवा पुस्ताले न्याय, पारदर्शिता र जिम्मेवारीका विषयमा उभिनु देशका लागि राम्रो संकेत भएको बताए।
जेनजी २.० का केन्द्रीय प्रबक्ता अबिन लिम्बूले प्रदेश कमिटी गठन अभियानको महत्वपूर्ण चरण भएको बताए। उनले अभियानले कुनै लाभ खोज्दैन, बरु सबै युवालाई आफ्नो अधिकार, आवाज र जिम्मेवारीकर्फ फर्काउन प्रेरित गर्ने प्रयास रहेको स्पष्ट गरे।
भेलाले प्रदेशका समस्यालाई प्राथमिकता दिने, युवाको सहभागिता बढाउने र संरचना मार्फत अभियानलाई सक्रिय बनाउने निर्णय गर्दै कार्यक्रम सम्पन्न भयो।
