हिमांशु राय -मोरङ बेलबारी । ‘कोसी साहित्य-कला परिषद् नेपाल’ को आयोजनामा स्रष्टा भेटघाट तथा बृहत अन्तरक्रिया कार्यक्रम सम्पन्न भएको छ । बेलबारी बहुमुखी क्याम्पस, मोरङको सभाहलमा एक कार्यक्रमको आयोजना गरेर संस्थाले भेटघाट तथा ‘संस्थाको अबको बाटो’ विषयक अन्तरक्रिया कार्यक्रम सम्पन्न गरेको हो ।
उक्त कार्यक्रमको प्रमुख अतिथि वरिष्ठ साहित्यकार हर्कमान तामाङ रहेका थिए । कार्य समिति, सल्लाहकार, विभिन्न विभागका सदस्य, केही शुभेच्छुक संस्था तथा व्यक्तिहरूको सहभागिता रहेको उक्त कार्यक्रममा प्रा.डा. भीम खतिवडा, कवि तथा आख्यानकार डा. छवि वैरागी घिमिरे, छन्दवाटिका नेपालका अध्यक्ष हरि कट्टेल, बेलबारी साहित्य विकास समितिका अध्यक्ष रमेश निरौला, मिक्लाजुङ साहित्य समाज, मोरङका अध्यक्ष इन्द्रप्रसाद घिमिरे, बेलबारी प्रज्ञा-प्रतिष्ठानका उपाध्यक्ष धनजित पराजुली, प्रलेस नेपाल कोसी प्रदेशका निवर्तमान अध्यक्ष तिला लेकाली, धिमाल भाषाका कवि तथा नाटककार टीकालाल धिमाल, गजलकार रोमु अधिकारी, विराट साहित्य समाजका वासु अधिकारीलगायतका स्रष्टाहरूले संस्थाले गर्नुपर्ने आगामी कार्यक्रमका बारेमा आआफ्ना धारणा राखेका थिए ।
सल्लाहकार समिति तथा विभिन्न विभागका सदस्यहरूलाई बधाइ तथा शुभकामना प्रदान गर्दै उनीहरूले नेपाली साहित्यको विकासमा एउटा फरक दृष्टिकोणका साथ स्थापना भएकामा खुसी व्यक्त गर्दै यसले नेपाली साहित्यका पारखीलाई केही आशा जगाएका बताए ।
‘कोसी साहित्य-कला परिषद् नेपाल’ अध्यक्ष केशु विरहीले संस्थाले हालसम्म गरेका गतिविधि तथा आगामी कार्यक्रमका बारेमा जानकारी गराएका थिए । संस्थाले सङ्ख्यात्मक भन्दा पनि थोरै तर गुणात्मक कार्यक्रम सञ्चालन गर्ने, यस वर्ष प्रकाशन, विमर्श तथा समुदाय लक्षिक केही कार्यक्रम मात्र गर्ने अध्यक्ष विरहीले बताए ।
कार्यक्रममा विष्णु भण्डारी आचार्य, चिरञ्जीवी काफ्ले, प्रिन्स प्रमोदकुमार ढकाल, मनोस विश्वकर्मा, मनोज कार्की, श्रेष्ठ परिक्रमा, खेमचन्द्र अधिकारी, सुन्दर भट्ट, जुनु बुढाथोकी, एकराज भट्टराई, मुना मिश्र, रामकुमार हुक्पा चोङबाङ, प्रकाश भट्टराई, दुर्गा खरेललगायतका स्रष्टा/कलाकारहरूको बाक्लो उपस्थिति रहेको थियो ।
केशु विरहीको अध्यक्षतामा सम्पन्न कार्यक्रमको सञ्चालन भने संस्थाका सचिव नवराज पोखरेल ‘नवशिला’ को रहेको थियो ।
