कृष्ण कुँवर। कतारविरुद्धको रोमाञ्चक टी–२० अन्तर्राष्ट्रिय खेलमा नेपालले कठिन तर ऐतिहासिक जित हात पारेको छ।
नेपालका स्पिनर सन्दीप लामिछानेले घातक बलिङ गर्दै ५ विकेट लिएर खेलको बहाव नेपालतर्फ मोडिदिए।
उत्कृष्ट प्रदर्शनका कारण सन्दिपलाई ‘प्लेयर अफ द म्याच’ घोषित गरिएको हो।
त्यस्तै, नन्दन यादवले कतारका जुबैर अलिको महत्वपूर्ण विकेट लिए भने गुलशन झाले लिएको शानदार क्याचले खेलको रफ्तार नेपालतिर फर्कायो।
सन्दीपले ३.५ ओभरमा १८ रन खर्चिँदै ५ विकेट हात पारे।
अन्तिम ओभरमा कतारलाई जितका लागि १० रन आवश्यक रहँदा उनले मात्र ४ रन दिएर दुई विकेट झारे र कतारलाई अलआउट गराए।
सोमबारको खेलमा कतारको पहिलो विकेट पनि सन्दीपकै खातामा परेको थियो।
अविश्वसनीय ५ विकेटसँगै सन्दीपले आफ्नो अन्तर्राष्ट्रिय क्रिकेट करियरमा २५०औं विकेट पुरा गरेका छन्, जसमा ओडिआईमा १२७ र टी-२०आईमा पनि १२७ विकेट समावेश छन्।
यो उनको करियरको दोस्रो ५-विकेट प्रदर्शन हो।
एक चरणमा हारको संघारमा पुगेको नेपाल अन्त्यतिर खेलाडीहरुको उत्कृष्ट बलिङ र फील्डिङका कारणले खेल पल्टाउन सफल भयो।
अन्ततः नेपालले रोमाञ्चक जित निकाल्दै समर्थकहरूलाई उत्साहित बनाएको छ।
ओमानको अल अमिरात क्रिकेट मैदानमा भैरहेको ICC पुरुष टी-20 विश्वकप एसिया तथा ईस्ट एसिया–प्यासिफिक छनौटका लागि सुपर सिक्स मा खेलिरहेको नेपालले आइतबार युएईलाई एक रनले हराएको थियो।
सोमबार कतारलाई ५ रनले जितेको छ। टि20 विश्वकपमा छानिन नेपालले अझै एक खेल जित्नुपर्नेछ।
सो खेल जिते नेपाललाई २०२६, ७ फेब्रेवरीबाट मार्च ८ सम्म इन्डिया र श्रीलङ्का हुने टि-20 बिश्वकपमा देख्न पाउनेछौं।
नेपाल र कतारबीच टी-२०आईमा हालसम्म ४ पटक भेट भएको छ। ३ खेलमा नेपाल विजयी भएको छ भने १ खेल कतारले जितेको थियो।
