✏️ लेखक : चन्द्रप्रकाश बानियाँ : एकजना मित्रले भन्दै हुनुहुन्थ्यो : ८४ मा रास्वपा आउँछ !! हो, आउनसक्छ । पार्टी खोल्नेले सत्तामा पुगिएला भनेरै खोल्ने हो । कुरो के हो भने कसैले आओस् भन्दैमा आउने होइन र कसैले नआओस् भने पनि आउन सक्छ ।
राणाशाही नआओस् भन्नेहरु अवश्य थिए होलान् । आयो । १०० वर्ष खायो । पञ्चायत आउनु हुदैन भन्नेहरु पनि हुँदा हुन् । आयो । त्यसले पनि ३० वर्ष खायो ।
बहुदल र गणतन्त्र आउनु हुदैन भन्नेहरु पनि थिए । आयो । अर्को ३० वर्ष खायो । काँग्रेस र एमालेहरु सत्तामा आउनु हुदैन भनेर लाग्नेहरु थिए र छन् । तर तिनहरुले पटक पटक चुनाव जितेकै छन् । सत्तामा ढलिमलि गरेकै छन् ।
माओवादीहरु जङ्गलमै सिद्धिनुपर्छ भन्नेहरु बहुमतमै थिए । राजावादीहरु थिए । काँग्रेस एमालेहरु थिए । तिनैथरी मिलेर माओवादी सक्न पुलिस सेना प्रयोग गरेकै हुन् । सकिएनन् । नसकिएका मात्र होइनन् सत्तामै आइपुगे । अझै सत्ताको वरिपरि घुम्दैछन् ।
त्यस्तै हो । रास्वपा पनि आउन सकिन्छ भनेरै जन्मिएको हो । आउला । खुट्टो भित्र छिराइसकेकै छ । कुरो कति मात्रै हो भने आएपछि के गर्छ भन्ने कुराको ट्राएल देखाइसकेको छ ।
कुनै अर्को ग्रहबाट झरेका मान्छे रास्वपामा जम्मा भएका होइन रहेछन् । ती यही समाजकै उत्पादन हुन् । साँचो कुरा गर्ने हो भने समाजका उत्पादनमध्येका पनि खराबमध्येकै हुन् ।
कोठेबारीमा रोपेको अम्बाको बिरुवाले कस्तो फल दिन्छ भन्ने कुरा त्यसको नस्लले नै बताउँछ । उन्नत (बिकासी) बिउ परेछ भने ठूला फल लाग्छन् । स्थानीय काठे जातको बिउ हो भने साना फल लाग्छन् ।
रास्वपाका सबै सदश्य खराबै छन् भन्नु आग्रह ठहर्छ तर रास्वपाको नेतृत्व अर्थात अध्यक्षको पूर्वचरित्र असल छैन भन्ने कुरा हजार प्रतिशत सत्य हो । परीक्षित हो । प्रमाणित हो ।
कुनै पनि सेनाको युद्धमा हुने हारजित त्यसको सेनापतिको सुझबुझ र योग्यतामा भरपर्छ भनिन्छ ।
त्यसैले विना विचार, विना कार्यक्रम, विना दृष्टिकोण, विना सिन्द्धान्त, विना दर्शनको ठूलो भीड जम्मा हुनसक्छ तर त्यसले कुनै काम सफलतामा पुर्याउने क्षमता राख्दैन ।
रास्वपा सत्तामा पुग्ला, त्यसले गर्छ के ?! देश र समाजलाई कुन राजमार्गबाट डोर्याएर कहाँ पुर्याउँछ ?!
निश्चित कुरा हो रास्वपाले कहीँ पुर्याउने क्षमता राख्दैन । रास्वपाको नेतृत्व लुटेराहरुको नयाँ अवतार मात्र हो भन्ने कुरा नेताले आजसम्म देखाएको चरित्रबाट स्पष्ट भएको छ ।
रास्वपाको सरकार चाखिसकेपछि “दुख पायौ मङ्गले आफ्नै ढङ्गले” भनेर आफैलाई लोप्पा ख्वाउनुभन्दा नेपालीहरुसंग अर्को विकल्प रहने छैन भनेर निर्धक्क भन्न सकिन्छ ।
बाँसको चोया निकाल्न पनि किरासिरा नलागेको सोझो सर्लक्कको घारो चाहिन्छ । किरा लागेको खोटी परेछ भने काम लाग्दैन ।
असल फल दिने अम्बाको बिरुवा रास्वपा हुदै होइन । यो आग्रहको कुरा होइन । आजसम्म भोगेको तितो इतिहासबाट पुष्टि भएको कुरा हो ।
