१.
बहिराको भीडमा म मेरै मुख टाल्न खोज्दैछु
आफैलाई विपक्षी राखी मुद्दा हाल्न खोज्दैछु
हुक्के,चम्चे र लम्पसारवादीको संगत छोडेर,
फरक ढंगले अर्थपुर्ण जीवन थाल्न खोज्दैछु।
२.
अनायसै दलनमा पारिन्छन् असहाय यहाँ
अझै हेरिन्छ मान्छेको वर्ग र समुदाय यहाँ
स्वयम् मानव अधिकारकर्मी रोएर हिड्छ,
सर्वसाधारणले कसरी पाउँछ न्याय यहाँ।
३.
तिमी र म जाउँ कतै घुम्न, आऊ न ए! ठुली
मजा हुन्न र एउटै छातामा बेला होस् गोधूलि
उमेरमै हो हाँसखेल गर्ने, के मान्छौ धेरै पीर
अपराध करार गरेछन् भने,
चडौँला न शूली।
४.
जब जुँधे मेरा यी नयन , तिम्रा ती नयनसंँग
मेरो मस्तिष्कको लडाईं ,चलेको छ मनसंँग
कुरुप समाजका ठेकदारहरू तह लगाउन,
तिम्रालागि म भिडौँला सबैखाले चलनसंग।
५.
अविरल पोखिउन् म माथि तिम्रा नजरहरू
ताकि सुखले बितुन् जिन्दगीका सफरहरू
सजाउन त मुटुभित्रै सजाको छु तिमीलाई
जति हेरेपनि किन पूरा हुन्नन् मेरा रहरहरू
६.
काला कोटेको, भव्य वकालत देखेको छु
न्याय माग्नेको दयनीय, हालत देखेँको छु
तथ्य, प्रमाण र साक्षीहरू तोडमरोड गरेर,
मर्यादा विपरीत चल्ने अदालत देखेँको छु।
७.
कयौंले स्वर्गको उडान भरे नयाँ बिहानीको आसमा
हाँसीहाँसी मृत्युवरण गरे नयाँ बिहानीको आसमा
विडम्बना यहाँ त हजुर,रातपछि फेरि रातै आयो,
सृष्टिको धर्मपनि चित परे,नयाँ बिहानीको आसमा।
८.
जसको जोत उसैको पोत अब अधियाको कुरा हुँदैन
कमरेड गणतन्त्रमा , कमैया र हलियाको कुरा हुँदैन
ट्याक्टर र हार्वेस्टरको युगमा देश पसेकै हो भने त,
हलो, कोदालो, डोकोनाम्लो र कचियाको कुरा हुँदैन।
९.
सजिएर सांस्कृतिक भेषभूषामा नाँच्नुको मजा बेग्लै छ
चन्डी,मारुनी र देउडामा कम्मर भाँच्नुको मजा बेग्लै छ
दोहोरी, झ्याउरे र हाक्पारे भाकामा समर्पित हुंँदै
आफ्नै मौलिक नेपाली पारामा बाँच्नुको मजा बेग्लै छ।
१०.
न सोध्छौ मरो खबर, न आफ्नो बताउँछौ यार
धोक्रो भरिएन,कतिन्जेल गोजि तताउँछौ यार
खतम गरेकै राम्रो आडम्बरी नाताको के अर्थ,
घृणा गरेर देखावटी माया किन जताउंँछौ यार।
राजु परियार
बेलबारी न.पा. मोरङ
