काठमाडौं । नेकपा एमालेको सक्रिय राजनीतिमा पूर्वराष्ट्रपति विद्यादेवी भण्डारी पुनः प्रवेश गरेकी छन्। पछिल्लो समय उनी निरन्तर सार्वजनिक कार्यक्रमहरूमा देखिन थालेकी छन् भने विभिन्न राजनीतिक भेटघाटहरूलाई पनि तीव्र पारेकी छन्। यही क्रममा भण्डारीले मंगलवार बूढानीलकण्ठ नगरपालिकाको वार्षिक नगर विकास योजना, आर्थिक सर्वेक्षण तथा आर्थिक वर्ष २०८१/८२ को बजेट सार्वजनिकीकरण कार्यक्रममा प्रमुख अतिथिका रूपमा सहभागिता जनाइन्।
उनी बूढानीलकण्ठकै स्थायी बासिन्दा हुन्। त्यस्तै, उनले २०५०, २०५१ र २०५६ सालमा यही क्षेत्रबाट सांसद जितेकी थिइन्। यद्यपि, २०६४ को संविधानसभा निर्वाचनमा नेपाली कांग्रेसकी सुप्रभा घिमिरेसँग पराजित भएपछि उनले प्रत्यक्ष चुनावमा उम्मेदवारी दिएकी छैनन्। तर हालको सक्रियता एमाले राजनीतिमा उनको पुनरागमनको संकेतका रूपमा हेरिएको छ।
कार्यक्रममा सहभागी हुनुभन्दा अघि उनले हालसालै विभिन्न राजनीतिक दलका नेतासँग लगातार भेटघाट गरिरहेकी छन्। मंगलबार मात्रै उनले पत्रकार सम्मेलन आयोजना गरी आफ्नो नयाँ अभियानबारे जानकारी दिएकी थिइन्।
साथै, भण्डारीले विद्या–मदन भण्डारी ७५ औं जयन्ती मूल व्यवस्थापन समिति गठन गरी देशव्यापी अभियानको थालनी गरेकी छन्। उक्त समितिको संयोजक बागमती प्रदेशका पूर्वमुख्यमन्त्री डोरमणि पौडेल रहेका छन्। समितिमा देशैभरबाट नेताकार्यकर्ता समावेश गरिएको छ। यो अभियान ‘मदन भण्डारी फाउण्डेशन’ मार्फत सञ्चालन गरिनेछ।
समितिका अधिकांश सदस्यहरूले विद्यादेवी भण्डारी नेकपा एमालेको नेतृत्वमा फर्कनुपर्ने धारणा राख्दै आएका छन्। यसले एमालेभित्रको भावी नेतृत्वमा समेत बहस सुरु गराएको छ। पार्टी अध्यक्ष केपी शर्मा ओलीपछि नेतृत्वको खोजी भइरहेको एमालेमा भण्डारीको पुनः सक्रियता शक्तिशाली सन्देशका रूपमा हेरिएको छ।
भण्डारी नगरपालिकाकी स्थायी बासिन्दा भएकाले उनलाई कार्यक्रममा प्रमुख अतिथिका रूपमा आमन्त्रण गरिएको मेयर मिठाराम अधिकारीले रातो सूर्यलाई बताए । कार्यक्रममा उपमेयर अनिता लामाले भण्डारीको योगदानको प्रशंसा गरेका थिए।
यससँगै, पूर्वराष्ट्रपति विद्यादेवी भण्डारीको व्यक्तिगत वेबसाइट समेत सार्वजनिक गरिएको छ जसमा उनको राजनीतिक यात्रा, राष्ट्रपतिका रूपमा योगदान र भावी योजनाहरू उल्लेख गरिएका छन्।
भण्डारीको यस्तो सक्रियता एमाले मात्रै नभई समग्र नेपाली राजनीतिमा नयाँ तरंग ल्याउने विश्लेषण गरिँदैछ। उनको राजनीतिमा पुनरागमनले नेकपा एमालेभित्र नेतृत्वको प्रतिस्पर्धा र सन्तुलनमा असर पार्ने निश्चित देखिन्छ।
