रौतहट । संघीय गणतान्त्रिक गठबन्धन अन्तर्गत पाँच दलहरूको जिल्ला स्तरीय महत्वपूर्ण बैठक रौतहट जिल्लाको गडुरा स्थित एक कार्यक्रममा सम्पन्न भएको छ। बैठक नेपाल जनजागृति पार्टीका केन्द्रीय अध्यक्ष धुपलाल निषादको प्रमुख आतिथ्यमा तथा नेपाल संघीय समाजवादी पार्टीका जिल्ला इन्चार्ज लक्ष्मी शाहको अध्यक्षतामा सम्पन्न भएको हो।
बैठकमा पाँचै दलका केन्द्रीय सदस्यहरू, जिल्ला पदाधिकारीहरू र स्थानीय नेता तथा कार्यकर्ताहरूको उपस्थिति रहेको थियो। बैठकले आउँदो असार ३२ गते रौतहटको सदरमुकाम गौरमा आयोजना हुन लागेको संयुक्त जनजागरण सभा तथा अन्तरक्रिया कार्यक्रमलाई भव्य, ऐतिहासिक र सफल बनाउने निर्णय गरेको छ।
बैठकले विशेषतः गौर नगरपालिकामा नाराबाजी, ब्यानरसहितको नगर परिक्रमा गर्ने कार्यक्रमको तयारी गर्ने निर्णय लिएको छ। नगर परिक्रमार्पछि मुख्य कार्यक्रम सम्पन्न गरिनेछ, जसमा प्रमुख वक्ताहरू नेपाल सङ्घीय समाजवादी पार्टीका केन्द्रीय अध्यक्ष तथा पूर्वगृह राज्यमन्त्री संघीय गणतान्त्रिक गठबन्धनका संयोजक मोहम्मद रिजवान अन्सारी ज्यू। बहुजन एकता पार्टीका केन्द्रीय अध्यक्ष हरिनन्दर अम्बेडकरज्यू। नेपाल सद्भावना पार्टीका केन्द्रीय अध्यक्ष रामकुमार महतो ज्यू। नेपाल जनजागृति पार्टीका केन्द्रीय अध्यक्ष धुपलाल निषाद ज्यू। र ऐतिहासिक जनता पार्टीको केन्द्रीय अध्यक्ष बद्री ठाकुरजीको विशेष उपस्थिति रहनेछ।
रौतहटबासी जनताप्रति आह्वान: गठबन्धनले यस कार्यक्रमलाई मधेशको अधिकार, पहिचान र संघीयता सुदृढीकरणका लागि महत्वपूर्ण मोडका रूपमा लिएको छ। यसै सन्दर्भमा, गठबन्धनले रौतहट जिल्लाका सम्पूर्ण नागरिक, युवा, महिलाहरू, बुद्धिजीवी, श्रमिक, किसान, दलित, आदिवासी, मुस्लिम, निषाद समुदाय , पिछडा वर्ग र सम्पूर्ण समुदायका प्रतिनिधिहरूलाई कार्यक्रममा उत्साहपूर्वक सहभागी भई आफ्नो समर्थन प्रकट गर्न हार्दिक आह्वान गरेको छ।
कार्यक्रमले लोकतान्त्रिक आन्दोलन, संघीयता, समावेशिता, सामाजिक न्याय र स्थानीय विकासका मुद्दाहरू उठाउने अपेक्षा गरिएको छ। विभिन्न वक्ताहरूले वर्तमान राजनीतिक परिस्थिति, मधेशको अधिकार, केन्द्र र प्रदेश सरकारप्रतिको भूमिका लगायत विषयमा धारणा राख्नेछन्।
संघीय गणतान्त्रिक गठबन्धनले यस्तो जनजागरण कार्यक्रममार्फत जनता र राज्यबीचको दूरी घटाउने र जनताका मुद्दालाई संगठित ढंगले उठाउने प्रयासस्वरूप यो कार्यक्रमलाई अघि सारेको बताएको छ।
कार्यक्रमलाई सफल बनाउनका लागि गठबन्धनका कार्यकर्ता, समर्थक र शुभचिन्तकहरूलाई आ–आफ्नो क्षेत्रमा परिचालन गरिने र प्रत्येक टोल, वडा तथा गाउँ–नगरमा प्रचार–प्रसार अभियान सञ्चालन गरिने पनि जानकारी दिइएको छ।
