काठमाडौँ । पूर्वराष्ट्रपति विद्या भण्डारी नेकपा एमालेमा फर्किएसँगै एमालेमा बढ्दै गएको तरंग सार्वजनिक कार्यक्रममै देखिन थालेको छ।
शनिबार विद्या भण्डारी सहभागी भएको मदन भण्डारी फाउण्डेसनको कार्यक्रममा ओलीपक्षधर नेताहरूको सहभागिता देखिएन।
फाउण्डेसनले ‘स्टेट, सोसाइटी एण्ड डेभलपमेण्ट जर्नल’को विमोचन कार्यक्रम राखेको थियो। यसअघि फाउण्डेसनले आयोजना गरेको कार्यक्रममा एमालेका ओलीपक्षका नेताहरू पनि सहभागी हुने गरेका थिए।
यस वर्ष भने ओलीपक्षका नेताहरूको सहभागिता नदेखिनुले भण्डारी एमाले फर्किएको तरंगका रुपमा हेरिएको छ।
बिहीबार इमेज च्यानलसँगको अन्तर्वातामा भण्डारीले अध्यक्ष बन्नेसम्मको संकेत गरेपछि दोस्रो तहका नेताहरूसमेत विभाजित भएका छन्। उनीहरूले सामाजिक सञ्जालमार्फत एकअर्कालाई घोचपेच गरिरहेका छन्।
भण्डारी सहभागी भएको कार्यक्रममा ओलीपक्षधर नेताहरू सहभागी नहुनुलाई ओलीपक्षधर नेता भानुभक्त ढकालको स्टाटससँग पनि जोडेर हेरिएको छ।
शुक्रबार सामाजिक सञ्जालमा स्थायी कमिटी सदस्यसमेत रहेका जनसंगठन संयन्त्रका प्रमुख ढकालले पार्टीको निर्णयविरुद्ध नबोल्नसमेत चेतावनी दिएका थिए।
विधान महाधिवेशन तयारीका क्रममा आयोजित जनसंगठनका इन्चार्ज र पदाधिकारीको भेलालाई सम्बोधन गर्दै ढकालले पार्टीको संस्थागत निर्णय नमान्ने जनसंगठनका पदाधिकारी नोटिसमा रहेको भन्दै भण्डारीका पक्षमा खुल्नेहरुलाई चेतावनी दिएका थिए।
अध्यक्ष ओलीको पक्षमा बलियोसँग उभिँदै आएका ढकालले भनेका थिए, ‘पार्टीका नीति, विधिमाथि तलबितल गरियो भने मात्र नेता होइन्छ भन्ने सोचाइ त्याग्नुहोस्। पार्टीको संस्थागत निर्णय नमान्दा हुन्छ भन्ने मानसकिता केही जनसंगठनका पदाधिकारीमा देखिन्छ। यस्तो प्रवृति पार्टीको नोटिसमा छ।’
शनिबार भण्डारी सहभागी कार्यक्रममा ओलीपक्षका नेताहरू सहभागी नहुनु उनको धम्कीलाई समेत जोडेर हेरिएको छ। फाउण्डेसनले आयोजना गरेको कार्यक्रममा भण्डारीलाई एमालेमा फर्किन लविङ गर्ने एक नेता सुरेन्द्र पाण्डे मात्र सहभागी भएका थिए।
तल्लो तहका नेताहरू पनि ओलीपक्षधर कोही देखिएनन्। भण्डारी असार १४ गते मदन भण्डारीको जन्मजयन्तीको अवसरमा एमालेको पार्टी सदस्यता नवीकरण गरेको घोषणा गरेकी थिइन्।
उनलाई एमालेको पार्टी अध्यक्षका रुपमा अगाडि सार्ने गरी एमालेमा फर्काइएको नेताहरू बताउने गर्छन्। उनको पार्टीभित्रको आगमनलाई लिएर ओलीपक्षधर तरंगित बनेको छ।
