भण्डारीको विषयमा एमालेभित्र दुईधार देखिएको छ भने माओवादी केन्द्र र एकीकृत समाजवादीमा उत्साह थपेको छ । अनि, कांग्रेसभित्र डर सिर्जना भएको देखिन्छ । नेताहरूको सार्वजनिक रूपमा गरेका टिप्पणीले यस्तो अवस्था देखिएको हो ।
१४ असारमा भण्डारीले सक्रिय राजनीति फर्केको घोषणा गरेको हप्ता दिन नबित्दै माओवादी केन्द्रका वरिष्ठ उपाध्यक्ष नारायणकाजी श्रेष्ठले भण्डारीलाई भेटेर वाम एकताको पहल गर्न आग्रह गरेका थिए । श्रेष्ठले माओवादी केन्द्रमा सहज अवस्था नभएको भण्डारीसँग गुनासो पनि सुनाएका थिए । १९ असारमा भण्डारीसँग भेट गरेर श्रेष्ठ अमेरिका भ्रमणमा निस्केका छन् । भण्डरीसँग श्रेष्ठले भेटेको विषयले भने माओवादी केन्द्रभित्र तरंग पैदा गरेको छ ।
लगतै कांग्रेस सभापति शेरबहादुर देउवा मात्र होइन, सिंगो कांग्रेस केन्द्रीय कार्यसमिति भण्डारीको आगमनले वाम एकता हुने सक्ने आंशकामा देखिएको थियो । र, त्यही धारणा सभापति देउवाले बालुवाटार पुगेर एमाले अध्यक्ष तथा प्रधानमन्त्री केपी ओलीलाई सुनाएका थिए । देउवाले त भण्डारीलाई रोक्ने निर्णय लिनुपर्ने मत नै राखेका थिए ।
कांग्रेस नेता विमलेन्द्र निधिले भण्डारीको आगमनले वाम एकता हुने आंशका कांग्रेसलाई रहेको बताएका थिए । त्यति मात्र होइन, चिनियाँ कम्युनिष्ट पार्टीको सुझावमा भण्डारीले वाम ध्रुवीकरणको प्रयास गर्ने सम्भावना रहेको पनि निधिको आरोप थियो ।
यस्तो बेलामा चीन भ्रमणबाट फर्के लगत्तै एसका सम्मानित नेता झलनाथ खनालले भण्डारीको सक्रिय राजनीति वाम एकताका लागि सकरात्मक भएको बताएका छन् । एसका अध्यक्ष माधव नेपाललाई नैतिकता प्रश्न उठाएर चीन उडेका खनालले चीनबाट फर्केलगत्तै भण्डारीको पक्षमा बोलेका छन् । त्यति मात्र होइन, एमाले अहिलेको ठूलो वामपन्थी दल भएकोले उसले पहल गर्दा वाम ध्रुवीकरण सहज हुने बताएका छन् । २८ असार दिउँसो खनालले वामपन्थी शक्तिहरूबिचको एकतालाई जोड दिने गरी एमालेमा सक्रिय हुने कुराको स्वागत गरेका हुन् ।
‘यदि विद्या भण्डारीले वामपन्थी एकता आजको आवश्यकता हो भनेर राजनीतिमा प्रवेश गर्ने, एमालेमा प्रवेश गर्ने र एमालेको अध्यक्ष पनि बन्छु भन्ने हो भने हामीले सकारात्मक रूपमा लिनुपर्छ’ खनालले भनेका थिए ।
उनले अहिलेको समयमा सबैभन्दा ठूलो वामपन्थी समूह नेकपा एमाले नै रहेको बताए । भने, ‘त्यो समूहले वामपन्थीलाई एकताबद्ध गर्न नचाहेको हुनाले वामपन्थी एकता विभाजित अवस्थामा रहेको छ । एमालेले एकता गरौँ भनेर चाहने हो भने ठुलो वामपन्थी एकता नै हुन्छ ।’
चीन जानुअघि एसको सचिवालय बैठकमा पतञ्जली जग्गामा भएको भ्रष्टाचार मुद्दा अध्यक्ष माधवकुमार नेपालविरुद्ध २२ जेठमा दर्ता भए पनि अध्यक्षबाट राजीनामा नदिएकोमा खनालले प्रश्न उठाएका थिए । एसभित्र यो विषयले दुई लाइन सिर्जना गरेको छ ।
त्यहीकारण चीनबाट फर्केपछि पनि खनालले विमानस्थलमा अध्यक्ष नेपालमाथि लगाइएको मुद्दा हालसम्मकै नौलो रहेको बताए । उनले यो विषय तीन करोड नेपालीको सरोकार भएको भन्दै एउटा मात्रै पार्टी र सचिवालयको विषय अब नरहेको तर्क गरे ।
नेपालविरुद्ध देखिएका खनाल पार्टी नेतृ रामकुमार झाँक्रीको पक्षमा उभिएका छन् । पार्टी बैठकदेखि सार्वजनिक मञ्चमा समेत झाँक्रीको पक्षमा देखिएका हुन् । पार्टी अध्यक्ष नेपालबारे नेतृ रामकुमारी झाँक्रीको अभिव्यक्तिप्रति लक्षित गर्दै खनालले यस्ता विषयमा विभिन्न व्यक्तिहरूले टिकाटिप्पणी हुनु सामान्य रहेको बताए । ‘यस्ता विषयमा टीकाटिप्पणी गर्ने हकबाट कसैलाई तलमाथि गर्न सक्दैनौँ ’ उनले भने ‘सुन्दै जानुपर्छ, गुन्दै जानुपर्छ । के सही हो, के गलत हो अदालतको निर्णयको प्रतीक्षा गरिरहेका छौँ ।’
