काठमाडौँ। सभामुख देवराज घिमिरेले सुशासन, द्रुत आर्थिक विकास र दिगो शान्तिका दृष्टिकोणले अफ्रिकी मुलुक रुवाण्डा आज विश्वकै लागि एक उदाहरणीय राष्ट्र बन्न सफल भएको बताएका छन्।
शुक्रबार काठमाडौँमा आयोजित रुवाण्डाको ३१औँ मुक्ति दिवस को अवसरमा बोल्दै सभामुख घिमिरेले केही वर्षअघि मात्रै कूटनीतिक सम्बन्ध स्थापना भएको नेपाल र रुवाण्डाबीच पर्यटन, ऊर्जा, सूचना प्रविधि, कृषि र व्यापारलगायत क्षेत्रमा सहकार्य गरेर दुवै देश लाभान्वित हुन सक्ने सम्भावना रहेको बताए।
दुवै मुलुकले विगतमा द्वन्द्वका कारण अपूरणीय क्षति व्यहोरेको स्मरण गर्दै उहाँले राष्ट्रसंघीय शान्ति स्थापनामा दुवैले पुर्याएको योगदान उल्लेखनीय रहेको बताए। साथै, अल्पविकसित राष्ट्रको हैसियतले आपसी सहयोग र सहकार्यलाई प्राथमिकता दिँदै जनताको जीवनस्तर उकास्न अझ बढी सहकार्य आवश्यक रहेको धारणा व्यक्त गरे।
गणतन्त्र रुवाण्डाकी भारत तथा नेपालका लागि राजदूत मुकाङ्गीरा जाक्लीनले सुशासन, पारदर्शिता, लैङ्गिक समानता, समावेशी सहभागिताजस्ता आधारभूत मूल्यहरूलाई प्राथमिकतामा राख्दै रुवाण्डाले तीव्र आर्थिक प्रगति हासिल गरेको जानकारी दिइन्।
नेपाल उद्योग वाणिज्य महासङ्घका अध्यक्ष चन्द्रप्रसाद ढकालले निजी क्षेत्रलाई विश्वासमा लिएर शिक्षा, स्वास्थ्य, पूर्वाधार, पर्यटन, सूचना प्रविधि र कृषि क्षेत्रमा उल्लेखनीय उपलब्धि हासिल गर्न रुवाण्डाले देखाएको बाटोबाट नेपालले पाठ सिक्नुपर्ने बताए।
रुवाण्डाको अवैतनिक परिषद्का ‘डिन’को भूमिकामा समेत रहेका ढकालले सन् २०१५ मा रुवाण्डाको प्रतिव्यक्ति आय करिब २०० अमेरिकी डलर मात्र रहेकोमा अहिले त्यो बढेर ८०० डलर पुगेको बताए। कुल ग्राहस्थ उत्पादनमा १० प्रतिशतसम्मको वृद्धि उल्लेखनीय उपलब्धि भएको उनको भनाइ थियो।
परराष्ट्र मन्त्रालयका सहसचिव रामकाजी खड्काले सन् १९९४ को हिंसा र द्वन्द्वबाट मुक्त भएपछि रुवाण्डाले आन्तरिक स्थायित्व कायम गर्दै शिक्षा, स्वास्थ्य, पूर्वाधार, पर्यटन, ऊर्जा र कृषिमा अतुलनीय प्रगति गरेको जानकारी दिए।
कार्यक्रमका आयोजक तथा नेपालका लागि रुवाण्डाका अवैतनिक महावाणिज्यदूत प्रज्वलजङ्ग पाण्डेले नेपाल–रुवाण्डाबीच व्यापार प्रवर्द्धन, दिगो शान्ति, समृद्धि र कूटनीतिक सम्बन्ध विस्तारका पक्षमा आफूले सक्रिय पहल गरिरहेको बताए। लगानीका दृष्टिले सहकार्य गर्न मिल्ने क्षेत्रहरू पहिचान गरी दुवै देशका जनतालाई लाभ पुग्ने किसिमको सहकार्य गर्न उनले आग्रह गरे।
कार्यक्रममा रुवाण्डाले विश्वमै कफी उत्पादन र निर्यातमा पुर्याएको योगदान, द्वन्द्वरत पक्षबीच मेलमिलाप, पुनःनिर्माण र शान्ति स्थापनामा गरेको उदाहरणीय कार्यका विषयमा पनि चर्चा गरिएको थियो।
