काठमाडौं । जिल्ला अदालत काठमाडौंले मागेको १५ लाख रुपैयाँ धरौटी बुझाउन नसकेपछि युनुस अन्सारीलाई कारागार चलान गरिएको छ ।
काठमाडौं जिल्ला अदालतका न्यायाधीश बलराम लम्सालको इजलासले उनलाई १५ लाख रुपैयाँ धरौटीमा रिहा गर्न आदेश दिएको थियो । तर, सो धरौटी रकम बुझाउन नसकेपछि अन्सारीलाई कारागार चलान गरिएको हो ।
जाली नोटको प्रकरणमा कैद भुक्तान गरेर रिहा भएकै दिन गत १० जेठमा उनलाई प्रहरीको केन्द्रीय अनुसन्धान ब्युरो (सीआईबी) ले सम्पत्ति शुद्धीकरणको मुद्दामा नक्खु कारागारबाट पक्राउ गरेको थियो । आफूलाई पुनः पक्राउ गरेको भन्दै उनले सर्वोच्च अदालतमा बन्दीप्रत्यक्षीकरणको रिट निवेदनसमेत दिएका थिए ।
सम्पत्ति शुद्धीकरणको मुद्दामा अन्सारी अध्यक्ष रहेको नेसनल टेलिभिजनसहित प्रतिवादीमध्येका अन्सारीकी श्रीमती सालमा खातुन, प्रमिला अधिकारी र सुवेश्वरप्रसाद कुशवाहविरुद्ध मुद्दा दायर भएको थियोे ।
अन्सारीविरुद्ध अनुसन्धान सकेर प्रहरीले शुक्रबार मात्र रायसहितको अनुसन्धान प्रतिवेदन पेस गरेको थियो । अन्सारीविरुद्ध ९ करोड ९ लाख ५३ हजार ७ सय ९ रुपैयाँ बिगो कायम गर्दै मुद्दा दायर गरिएको थियो ।
अन्सारीसहित ६ जनालाई त्रिभुवन अन्तर्राष्ट्रिय विमानस्थलबाट १० जेठ २०७६ मा पक्राउ गरिएको थियो । उनीहरूबाट ७ करोड ७६ लाख नक्कली भारु नोट बरामद भएको थियो । यस घटनामा उनलाई दोषी ठहर गर्दै ६ वर्ष कैद, ६० हजार रुपैयाँ जरिमाना र १ हजार ३ सय रुपैयाँ क्षतिपूर्तिको सजाय भएको थियो ।
