सर्लाही। नेपाल संघीय समाजवादी पार्टी सर्लाही जिल्ला समितिको बैठक आज पार्टीको जिल्ला उपाध्यक्ष सिकन्दर राउतजीको अध्यक्षतामा सम्पन्न भएको छ। पार्टीका केन्द्रीय अध्यक्ष तथा पूर्व गृह राज्यमन्त्री रिजवान अन्सारीको प्रमुख आतिथ्यमा सम्पन्न बैठकले संगठन सुदृढीकरण, गठबन्धनप्रति समर्थन, र आगामी कार्यक्रमको तयारीसम्बन्धी विभिन्न महत्वपूर्ण निर्णयहरू पारित गरेको छ।
बैठकमा केन्द्रीय सदस्य तथा जिल्ला इन्चार्ज सीताराम शाहजी ,केन्द्रीय सदस्य फातमा खातुनजी केन्द्रीय सदस्य मुस्तकिम अन्सारी जी लगायत उल्लेखनीय रुपमा जिल्ला कमिटी सदस्य, स्थानीय प्रतिनिधिहरूको सहभागिता थियो। बैठकको सञ्चालन जिल्ला सचिव रजी अहमदले गर्नुभएको थियो।
बैठकले संघीय गणतान्त्रिक गठबन्धनद्वारा असार २५ गते सर्लाहीको मलंगवामा आयोजना गरिने जनजागरण अभियान अन्तर्गत अन्तरक्रिया तथा सभा कार्यक्रमलाई भव्य र सफल बनाउन सम्पूर्ण कार्यकर्तालाई सक्रिय सहभागिता जनाउन निर्देशन दिएको छ।
संगठन विस्तारको ठोस योजना :
बैठकले पार्टी संगठनलाई तल्लो तहसम्म सशक्त र समावेशी बनाउने निर्णय गर्दै सर्लाही जिल्लाका सबै चारवटा निर्वाचन क्षेत्र, आठवटा प्रदेशसभा क्षेत्र, साथै नगरपालिका, गाउँपालिका, र वडास्तरसम्म कमिटी निर्माण गर्ने निर्णय गरेको छ।
पार्टीले संगठन निर्माणसँगै जिल्ला पार्टी कार्यालयलाई व्यवस्थित रूपमा सञ्चालन गर्ने र जनतालाई परेका समस्या समाधानमा सक्रिय रूपमा सहभागी हुने नीति पनि अवलम्बन गर्नेछ।
अध्यक्ष अन्सारीको सम्बोधन
बैठकमा बोल्दै अध्यक्ष अन्सारीले भने:
“संघीय गणतान्त्रिक गठबन्धन नेपाली जनताको अधुरो सपना पूरा गर्न, उत्पीडित वर्गको सशक्त प्रतिनिधित्व सुनिश्चित गर्न, भ्रष्टाचार, बेरोजगारीको अन्त्य, सुशासन, समानता र सामाजिक न्यायको स्थापनाका लागि बनेको हो। अब समय आएको छ—जनतासँग सीधा सम्पर्क गरेर परिवर्तनका लागि अघि बढ्ने।”
उनले सम्पूर्ण नेपाली जनतालाई उक्त जनजागरण अभियानका कार्यक्रमहरूमा सक्रिय रूपमा सहभागी भइ संघीय समावेशी लोकतान्त्रिक आन्दोलनलाई सशक्त बनाउने आह्वानसमेत गरे।
