काठमाडौं । एमालेको आन्तरिक राजनीति असार १४ पछि तीव्र गतिमा ध्रुवीकृत हुन थालेको छ । एमालेको सक्रिय राजनीतिमा फर्किने एमाले पूर्वउपाध्यक्ष तथा पूर्वराष्ट्रपति विद्यादेवी भण्डारीको घोषणासँग नेताहरूले निकटता देखाउने संकेत गर्न थालेका छन् । अध्यक्ष केपी ओली समूह र विद्या भण्डारी समूहको कित्तामा रहेको छनक पदाधिकारीहरूले १४ असारको कार्यक्रममै दिएका छन् ।
प्रधानमन्त्री तथा नेकपा एमाले अध्यक्ष केपी ओली, पूर्वराष्ट्रपति विद्यादेवी भण्डारी एवं नेकपा एमालेका वरिष्ठ उपाध्यक्ष ईश्वर पोखरेलले दिएको अभिव्यक्तिका कारण एमालेमा अब दुई धार प्रस्ट रहेको देखिएको छ । एउटा धारको नेतृत्व पार्टी अध्यक्ष केपी ओली र अर्को धारको नेतृत्व विद्या भण्डारीले गर्ने संकेत हिजो कार्यक्रमबाट देखिएको एमाले नेताहरूले बताएका छन् । १९ जनाको पदाधिकारी रहेको एमालेमा को कता लाग्छन् भन्ने चासो देखिएको छ ।
एमाले पदाधिकारी स्रोतका अनुसार विद्या भण्डारी समूहमा पदाधिकारी नौ जना खुलेका छन् । केपी ओली समूहमा ७ खुलेका छन् भने दुई जना दुवै समूहमा खुलिसकेका छैनन् । सचिव टोपबहादुर रायमाझी निलम्बनमा छन् ।
विद्या भण्डारी समूहको नेतृत्व भने अहिले वरिष्ठ उपाध्यक्ष ईश्वर पोखरेलले गर्ने देखिएको छ । अध्यक्ष केपी ओलीको लाइनलाई काउन्टर अहिले पोखरेलले नै गरिरहेका छन् । एमाले स्रोतको दाबीमा यो समूहमा पार्टीका उपाध्यक्ष सुरेन्द्र पाण्डे, युवराज ज्ञवाली र अष्टलक्ष्मी शाक्यले पनि भण्डारीलाई साथ दिने सम्भावना छ ।
यी तिनै जना नेता एमालेभित्र ओली लाइनमा नेता होइनन् । एमाले विभाजित हुँदा माधव नेपालसँग जान रोकिएका उनीहरू अहिले पनि ओलीका कतिपय निर्णयको विपक्षमा रहने गरेका छन् । एमालेको विधानमा भएको ७० वर्षे उमेर र दुई कार्यकालको बाध्यात्मक व्यवस्थाको पक्षमा उनीहरू छन् । त्यसैले, उनीहरूको साथ ओलीभन्दा भण्डारीको पक्षमा हुने आकलन गरिएको छ । त्यसैगरी, उपमहासचिव पृथ्वीसुब्बा गुरुङ पनि रहने सम्भावना छ ।
गुरुङलाई मन्त्री बनाएको पनि भण्डारीकै कोटाबाट भन्ने पहिला पनि चर्चा भइरहेको थियो । त्यसो त, सचिवहरू योगेश भट्टराई, गोकर्ण विष्ट, छविलाल विश्वकर्मा र रघुविर महासेठलाई पनि भण्डारीनिकट भनेर चर्चा गरिएको छ । यद्यपि, भट्टराई अहिले संस्थापन लाइनमा देखिन्छन् भने विश्वकर्मा मौन बसिरहेका छन् । विष्टले पनि आफ्नो धार प्रस्ट पारेका छैनन् ।
महासेठलाई भने पहिला ओलीनिकट मानिएको थियो । खासमा महासेठ वामदेव गौतमनिकट नेता हुन् । गौतमले झलनाथ खनाल समूह छोडेर ओलीको कित्ता लिनुअघि नै महासेठले गौतमलाई छोडेको एमाले नेताहरू बताउँछन् ।
अहिले केपी ओली समूहमा उपाध्यक्ष रामबहादुर थापा, गुरु बराल, महासचिव शंकर पोखरेल, उपमहासचिवद्वय प्रदीप ज्ञवाली र विष्णु रिमाल भने खुलेर देखिएका छन् । महासचिव पोखरेलले काठमाडौंमा भण्डारीले सक्रिय राजनीतिमा फर्किने घोषण गर्दै गर्दा पोखरामा पुगेर आलोचना गरिरहेका थिए ।
त्यसो त, महासचिव पोखरेलले केही दिनअघिको एमाले सचिवालय बैठकमा भण्डारीलाई रोक्न पूर्वराष्ट्रपति सक्रिय राजनीतिमा फर्किने विधानबाटै रोक लगाउनुपर्ने प्रस्ताव नै उठाएका थिए । एमाले स्रोतका अनुसार सचिव पद्मा अर्याललाई पनि ओलीनिकट सचिवकै रूपमा हेरिएको छ । उपाध्यक्ष विष्णु पौडेल र सचिव लेखराज भट्ट मौन देखिएका छन् । हुन त, पौडेललाई केही समय अघि विद्या भण्डारीनिकट भनेर चर्चा गरिएको थियो । तर, अर्थमन्त्री भएपछि पौडेल मौन रहँदै आएका छन् । अनि, अर्याललाई पनि पहिला भण्डारीकै समूहका लिने गरिए पनि अहिले उनी ओली लाइनमा देखिएको एमाले स्रोतहरूको भनाइ छ ।
