शौचालय नभएर समस्या झेल्दै आएको भन्दै अधिकारीले सपना भिलेजले शौचालयसहित पक्की घर निर्माण गरिदिएर ठूलो गुन लगाएको बताइन् । ‘पहिला शौचालय पनि थिएन, सपना भिलेजले त्यो पनि बनाइदियो’, उनले भनिन्, ‘अहिले त पक्की घर नै बनाइदिनुभयो । खरले छाएको, खडाईले बारेको घरमा बस्दा सर्पले टोक्छ कि भन्ने डर थियो । सर्प र बाढीको जोखिम अब टरेको छ, पक्की घरमा बस्ने सपना पनि पूरा भयो ।’
रत्ननगर नगरपालिका वडा नं–६, ओद्रा टोलमा रहेको उक्त बस्तीमा घर निर्माण गर्दा भएको आम्दानी र खर्च सार्वजनिक गरिएको छ । सौराहास्थित सपना भिलेज सोसल इम्प्याक्ट, रत्ननगर नगरपालिका र घरधनीहरुको संयुक्त लगानीमा सातवटा घर निर्माण गरिएको छ । सोमबार बस्तीमै सार्वजनिक सुनुवाइ कार्यक्रम आयोजना गरी घर निर्माण गर्दा भएको आम्दानी र खर्च सार्वजनिक गरिएको हो ।
सपना भिलेजका अध्यक्ष धु्रव गिरीको अध्यक्षतामा भएको कार्यक्रममा आम्दानी र खर्च सार्वजनिक गर्दै इम्प्याक्टका वित्त अधिकृत सुदन ओलीले इम्प्याक्टको ३३ लाख २७ हजार, रत्ननगर नगरपालिकाको १० लाख ५० हजार र सम्बन्धित घरधनीको १० लाख ५० हजार गरी ५४ लाख २७ हजार रूपैयाँमा सातवटा घर निर्माण गरिएको जानकारी दिए । सात सुकुमबासी परिवारका लागि दोस्रो तलामा चोटासहित भुइँतलामा दुईवटा कोठा र एउटा सामान्य हलसहितको पक्की घर निर्माण गरिएको हो । एउटा घर निर्माण गर्दा सात लाख ७५ हजार रूपैयाँ खर्च भएको वित्त अधिकृत ओलीले जानकारी दिए ।
सपना भिलेजका धु्रव गिरीले मुलुकको तेस्रो पर्यटकीय नगरी सौराहामा रहेका सुकुमबासी समुदायको अवस्था दयनीय रहेको देखेपछि स्थानीय सरकारसँग सहकार्य गरी सात परिवारका लागि घर निर्माण गरेको बताए । ‘सौराहाको काखमा अभाव झेलिरहेका परिवार रहेको देख्न सकिनँ’, उनले भने, ‘सुरूमा दुःख पाएका सात परिवारलाई घर बनायौँ ।’ उनले ओद्रामा निर्माण गरिएको सातसहित रत्ननगर, खैरहनी र राप्तीका ६१ विपन्न परिवारलाई सपना भिलेजले घर निर्माण गरिसकेको जानकारी दिए ।
जंगलको सिमानामा बस्ने परिवारलाई सुधारिएको चुलो, विपन्नलाई घर, बालबालिकालाई पौष्टिक आहार, चेपाङ समुदायलाई जीविकोपार्जनको आधार निर्माण गर्न आयआर्जनका कार्यक्रम तथा युवाहरुलाई सीप विकासको काम सपना भिलेजले गरिरहेको उनको भनाइ छ ।
कार्यक्रममा रत्ननगर नगरपालिका वडा नं–६ की कार्यवाहक वडाध्यक्ष तथा कार्यपालिका सदस्य बबिता चौधरीले ओद्राका सुकुमबासी परिवारका लागि स्थानीय सरकारको सहकार्यमा सपना भिलेजले आवास निर्माण गरेर ठूलो काम गरेको बताइन् ।
क्षेत्रीय होटल संघ चितवनका महासचिव महेश खनालले आर्थिक अभावका कारण झुप्रोमा बस्दै आएका सुकुमबासी परिवारका लागि घर बन्नु उदाहरणीय काम भएको बताए ।
सौराहाका पर्यटन व्यवसायी गोकर्ण गिरीले दयनीय अवस्थामा रहेको बस्तीमा सातवटा घर बनेपछि मुहार फेरिएको बताए । जंगली जनावर र बाढीको चेपटामा परेको परिवारलाई सपना भिलेजले सुरक्षित गर्ने काम गरेको उनको भनाइ छ ।
बाघमारा मध्यवर्ती सामुदायिक वनका परिषद् सदस्य सुदन महतोले सुकुमबासी बस्ती विकासमा वनले सहयोग गर्ने प्रतिबद्धता जनाए । सपना भिलेज सोसल इम्प्याक्टकी अनुगमन तथा मूल्याङ्कन अधिकृत राममाया श्रेष्ठले सञ्चालन गरेको उक्त कार्यक्रममा कार्यक्रम निर्देशक सावित्री पुरीले स्वागत मन्तव्य राखेकी थिइन् ।
