पोखरा । स्वतन्त्र पार्टीका सभापति रवि लामिछानेले सहकारी रकम हिनामिना आफ्नो कसुर नभएको बताएका छन्। उनले सहकारीको रकम गोरखा मिडिया नेटवर्कमा ल्याउन गितेन्द्रबाबु राई (जिबी) जिम्मेवार रहेको बयान दिएका हुन्।
पोखराको सूर्यदर्शन बचत तथा ऋण सहकारीको रकम अपचलनको मुद्दामा बिहीबारदेखि रविको बयान सुरु भएको छ। जिल्ला अदालत कास्कीमा न्यायाधीश नीतिज राईको इजालसमा लिला पछाईंको बयान सकिएसँगै रविको सुरु भएको हो।
खाजा समयपछि रविले झन्डै तीन घण्टा लामो बयान दिए। इजालसमा रविलाई सहकारी ठगी, सम्पत्ति शुद्धीकरण र संगठित अपराधसँग सम्बन्धित रहेर प्रश्न गरियो। रविले सबैजसो प्रश्नमा इन्कारी बयान दिएको एक अधिकवक्ता बताउँछन्।
ती अधिवक्ताका अनुसार रविले आफू कुनै कसुरमा संलग्न नरहेको र जिबी जिम्मेवार रहेको दोहोर्याइरहे। उनले सरकारी वकिलको रोहबरमा अनुसन्धान अधिकृतले लिएको बयानमा पनि सहकारीबाट रकम ल्याउने विषयमा आफू जानकार नभएको बताएका थिए।
‘…सहकारीबाट रकम ल्याउने विषयमा मसँग औपचारिक वा अनौपचारिक रूपमा सञ्चालक कोही कसैले कुनै पनि तवरबाट जानकारी वा सूचना गराइएको छैन/थिएन। त्यसैले सहकारीलाई नै गोरखा मिडियाले चेक दिँदा पनि कुनै ऋणको साँवा, व्याज वा किस्ता हो भन्ने बुझ्नुपर्ने एउटा पनि आधार र कारण थिएन’, अभियोग पत्रमा उल्लेख बयानमा भनेका छन्, ‘कुनै सहकारीबाट ऋण तिर्नु भन्ने कुनै सूचना, जानकारी, पत्रलगायतको कुनै ताकेता भएको अवस्थासमेत थिएन।’
आफूले हस्ताक्षर गरेको खाली चेकको दुरुपयोग भएकोसमेत न्यायाधीश राईसमक्ष बताए। राईको शुक्रबार पनि बयान निरन्तर हुनेछ।
रविलाई सम्पत्ति शुद्धीकरण मुद्दामा २७ करोड ८९ लाख ४४ हजार ७०५ रुपैयाँ आर्जन गरेको अभियोग लागेको छ। सहकारी ठगीतर्फ तीन करोड ३७ लाख ६५ हजार रुपैयाँ बिगो दाबीसहित मुद्दा दायर भएको हो।
आइतबार सरकारी वकिलको कार्यालय कास्कीले दायर गरेको मुद्दामा आठ कम्पनी, ५ जना सम्पत्ति प्रयोजनसहित गरेर ४४ जनाविरुद्ध मुद्दा दायर भएको छ।
कास्की प्रहरीको हिरासतमा गोरखा मिडिया नेटवर्कका सञ्चालक रहेका पूर्वडिआइजी छविलाल जोशीको सोमबार र मंगलबार बयान लिइयो। जिबीसँग मिलेर सहकारी रकम क्रिप्टोकरेन्सीमा समेत लगानी गरेकी लिला पछाईंको मंगलबार र बिहीबार बयान लिइयो।
रविको बयान सकिएपछि नेचर हर्ब्स इन्टरनेशनलका सञ्चालक रामबहादुर खनाल, सूर्यदर्शन सहकारीका सञ्चालक रहेका कृष्णबहादुर गुरुङको बयान हुनेछ। त्यसपछि प्रतिवादीको सूचीमा रहेका सूर्यदर्शन सहकारीका पूर्वउपाध्यक्ष मिना गुरुङ र पूर्वकोषाध्यक्ष आरती गुरुङको बयान हुनेछ। बयान सकिएपछि मात्रै थुनछेक बहस हुनेछ।
न्यायाधीश नीतिज राईको इजालसले थुनामा राख्ने, धरौटीमा वा सामान्य तारेखमा छाडेर मुद्दाको किनारा लगाउने आदेश गर्नेछ। तर, अझै केही दिन हिरासतमा रहेका प्रतिवादीको बयान लिने लाग्ने देखिन्छ।
सूर्यदर्शन सहकारी प्रकरणमा रवि, छवि, जिबीसहित कुल ६३ जनालाई प्रतिवादी बनाइएको छ। उनीहरुबाट एक अर्ब ५१ करोड ४० लाख १९ हजार १९४ रुपैयाँ ३ पैसा बिगो मागदाबी गरिएको हो।
