काठमाडौँ । साफ महिला च्याम्पियनसीप फुटबलमा जारी दोस्रो सेमिफाइनल तनावपूर्ण बनेको छ।
भुटानी रेफ्री ओम चोकीले खेललाई राम्रोसँग सञ्चालन गर्न नसक्दा प्रतिष्ठित महिला साफको दोस्रो सेमिफाइनलको अवस्थानै के हुने अन्योल बनेको छ।
हजारौँ दर्शक उपस्थित दशरथ रंगशालामा पहिलो हाफ राम्रोसँग सम्पन्न भए पनि दोस्रो हाफमा तनाव हुँदा खेलको ४० मिनेटको समयमा अधिकांश समय खेल स्थगित छ।
पहिलो पटक रेखा पौडेल दोहोरो पहेलो कार्ड पाएर मैदानबाट बाहिरिँदा दर्शकले बोतल प्रहार गर्दा केही मिनेट खेल स्थगित भएको थियो। तर ७१ औँ मिनेटमा भारतले गोल गर्दै खेलमा अग्रता बनायो।
लगतै गोलको खुसियालीमा भारतले केही लामो समय बिताउँदा मैदानबाट नेपालले खेल चलाएर खाली पोस्टमा गोल गरेको थियो।
लगतै मैदानमा रेफ्रीले नेपाललको गोललाई मान्यता दिएर सिटी फुके पनि पुनः केही समयपछि उक्त गोललाई मान्यता नदिँदा दर्शकहरु उत्तेजित भएर पानीको बोतलहरु प्रहार गरेका थिए। त्यसपछि खेल स्थगित भएको छ।
साथै नेपाली खेलाडीहरुले समेत मैदानमा खेल्न अस्वीकार गर्दा खेल रोकिएको छ।
