देशका शासकहरु
देश भत्काएर,देश टुक्राएर
निर्माण गर्न अभ्यास्त छन्
शिहंमर्रमर्र जडित निजी महल।
भ्यु टावर भन्दा अल्गा अल्गा
गगनचुम्वी शासकका महलहरु
हेरेपछी लाग्न थाल्छ बुर्ज खलिफा
शहरको कुनै भब्य घण्टाघर
अथवा माथी पहाडको टुप्पो देउराली।
वर्गमिटरमा क्रमश ………
खुम्चिदै गरको मेरो प्यारो देश
सुस्ता ,दशगजा,कालापानी र लिपुलेक
सिमा अतिक्रमण भोग्न विवश छ
प्राचिन नक्शाका प्रमाणहरु छोपेर
सिमानाको जंङ्गे पिलरहरु ढालेर
कसरी गरियो एकाएक मेरो
देशको सिमा अतिक्रमण?
चुच्चे नक्शा जारी गर्नेहरु लाई
सोध्न मन छ यस्ता प्रश्नहरु!
कीन प्राप्त भएन नक्शामा जारी
हाम्रो लिपुलेक,कालापानी
देशको भुभाग आज सम्म देशलाई?
ग्रेटर नेपालको त्यो प्राचिन नक्शा
टिस्टाकाँगडा,सतलज,भाग्सु र देहरादुन
पर्वतकी रानी शुन्दर दार्जिलिङ
वीर पूर्खाहरुको रगत पसिनाले आर्जेको
वीर गोर्खालीको वीरता र श्वाभिमानले सिर्जिएको
नेपाल आमाको नासो,अतिक्रमित ती भुमीहरु
चाँडै स्वदेश फर्काउने देशभक्तहरु
कोहि छ? प्रश्न अनुत्तरित छ
देशले भक्ति थापा र
कालुपाण्डेहरु पर्खिरहेछ
अमर शिंह र बलभद्र खोजिरहेछ।
कला,सौन्दर्यले भरिपुर्ण
शान्तिको शान्त तपभुमी
साँस्कृतिक,पृथक पहिचान बोकेर
सगरमाथा उभिएको छ विश्वमाझ
ईतिहासको पाना बाट कोट्याएर
नेपाली माटोको मिठो सुगन्ध
सारा संसार भरि फैलाउने
कुनै वीर योद्धालाई संम्झेर
जोड्दैछु नेपाली आस्थाको स्तम्भ।
उठाएर एकताको पर्खाल
भुगोल भित्र खोजिरहेछु
बर्षौ देखि वेखवर बाँचिरहेको
पुर्खाहरुको साहसको निसानी
पुर्खाहरुले रोपेका संस्कारका विरुवाहरु
र वैरीको चंगुलबाट रगत,पसिना बहाएर
कोरेको वलिदानको अमर कथा
दुःखले आर्जेको देशको जिवित अस्तित्व
सबै सबै पुरानो ऐतिहासिक मानचित्रमा
हेर्न लालयित नयाँ पिढिँहरु
जस्लाई जोडनु छ, देशको मुटु संग
नयाँ नेपालको नयाँ मुहारहरु संग।
सर्जक :- हिमांशु राय
बेलबारी न.पा.११,लक्ष्मीमार्ग मोरङ,
[email protected],
