डिकेन्द्र बस्नेत । पथरी शनिश्चरे वडा नं. १ मा स्थापित श्री पञ्चायत माध्यमिक विद्यालयले आफ्नो ४५ औं वार्षिकोत्सव तथा अभिभावक दिवस–२०८० भव्यताका साथ मनाएको छ ।
आज पञ्चायतले आफ्नै प्राङ्गणमा विविध साँस्कृतिक कार्यक्रमका साथै विद्यालयलाई विशेष योगदान गर्नेहरुलाई सम्मान गर्दै वार्षिकोत्सव मनाएको हो ।
विद्यालयमा धेरै समय अघिदेखि शिक्षण गर्दै आउनुभएका जानुका भट्टराई, सृजना राई, गणेश विष्ट, शम्भुराज थापा र कर्मचारी हेमकुमार गुरुङलाई सम्मान गरेको छ ।
वार्षिकोत्सव तथा अभिभावक दिवसको अवसरमा विपन्न विद्यार्थीहरुलाई पोशाक तथा न्यायो कपडा वितरण गरिएको थियो । कार्यक्रमको प्रमुख अतिथि पथरीशनिश्चरे नगर प्रमुख मोहन तुम्बापो, अक्षयकोष दाताको तर्फबाट कृष्ण कुमारी विक, सम्मानित शिक्षकहरुको तर्फबाट गणेश विष्ट लगायतले मन्तव्य राखेका थिए ।
यसैगरी पूर्व प्रधानाध्यापक एवं संविधासभा सदस्य चण्डीप्रसाद राई, नगरपालिकाका शिक्षा तथा खेलकुद शाखा प्रमुख सालिग्राम काफ्ले, अधिकृत नविन खुलाल, समाजसेवी मानबहादुर लिम्बु, देवराज भण्डारी, वडा नं. १ का अध्यक्ष भीम राई, २ का अध्यक्ष नैना राई, पथरी बहुमुखी क्याम्पस प्रमुख शान्तिराम तिम्सिना, भागिरथ माविकी प्रधानाध्यापक जानकी चेम्जोङ लगायतको उपस्थिति रहेको थियो ।
विद्यालयको शिक्षिकाहरुले नृत्य प्रस्तुत गरिनुका साथै विद्यार्थीहरुले नृत्य, गीत तथा साहित्यिक सामग्री प्रस्तुत गरिएको थियो । विद्यालय व्यवस्थापन समितिका अध्यक्ष युवराज बास्कोटाको सभापतित्वमा भएको कार्यक्रम प्रधानाध्यापक अर्जुन बुढाथोकीले सञ्चालन गर्नुभएको थियो । सो अवसरमा प्रमुख अतिथि तुम्वापोको हातबाट विद्यालयको वेवसाइट पञ्चायत मावि डटकमको सार्वजनिक गरिएको छ ।
