काठमाडौँ । आज शुक्रबारदेखि देशभरका हलमा प्रदर्शनमा आएको फिल्म ‘नाङ्गो गाउँ’ले सुरुवाती व्यवसाय राम्रो गरेको छ । आज बिहानैदेखि फिल्ममा दर्शकको चाप राम्रो रहेको छ । मल्टिप्लेक्सहरुमा समेत आज फिल्मले राम्रो व्यवसाय गरेको छ ।
दर्शकको चाप सुखद देखेपछि यसको निर्माणपक्ष उत्साहित देखिएको छ । फिल्मले आज पहिलो दिन ओपनिङ व्यवसाय राम्रो गरेको निर्माता हिमाल शर्माले बताए । ‘फिल्मलाई दर्शकले पनि राम्रो भनेका छन् । फिल्मको व्यवसाय र दर्शक प्रतिक्रियाबाट म उत्साहित छु’, शर्माले दंग हुँदै भने, ‘आजको व्यवसायले भोलि सार्वजनिक बिदामा झन् राम्रो हुने अनुमान गर्न सकिन्छ ।’ गर्ने संकेत दिएको छ ।
दीपेन्द्र लामाको लेखन तथा निर्देशन रहेको फिल्ममा दयाहाङ राई, मिरुना मगर, शिशिर वाङ्देल, साम्राज्ञी राज्यलक्ष्मी शाह, कर्मा, विशाल पहारी, बुद्धि तामाङ, रविन्द्र झा लगायतका कलाकारको अभिनय छ ।
फिल्म हेरेर फर्किएका दर्शकले गज्जब भनेपछि यसका निर्देशक दीपेन्द्र लामाले खुसी व्यक्त गरे । उनले फिल्मले जनतालाई मतदानको विषयमा सचेत गराएको र त्यो सबैले बुझे आफ्नो प्रयास सफल हुने सुनाए ।
हिमाल कडरियाको प्रस्तुतिमा तयार भएको यो फिल्ममा जय श्रेष्ठको लगानी छ । फिल्मका कार्यकारी निर्माता रामहरि श्रेष्ठ हुन् ।
